Қазақстан, Өзбекстан, Тәжікстан, Қырғызстан және Әзірбайжан әскерлері қатысуымен ауқымды әскери жаттығулар басталды

Қазақстан, Өзбекстан, Тәжікстан, Қырғызстан және Әзірбайжан қорғаныс министрліктерінің бөлімшелері қатысқан ауқымды әскери жаттығулар 14 қазанда Қорғаныс министрлігіне қарасты Орталық әскери округінің Каттақорған полигонында басталды.

Аймақтық бірлескен оқу-жаттығулар «Бірлік-2025» («Единство-2025») деп аталады. Олардың басты мақсаттары – әлемде өсіп келе жатқан геосаяси шиеленіс пен дағдарыс жағдайында, сондай-ақ жаңа қауіптер мен сын-қатерлердің пайда болуы жағдайында әскери ынтымақтастық пен әріптестікті нығайту, деп хабарлады Өзбекстанның Қорғаныс министрлігінің баспасөз қызметі.
Оқу-жаттығулар артиллерияны, ұшқышсыз ұшу аппараттарын, броньды машиналарды және басқа да қару-жарақтарды қолдану арқылы жауынгерлік дайындық тапсырмаларын қамтиды.

14 қазанда Өзбекстанның Самарқанд облысында «Бірлік-2025» бірлескен өңірлік оқу-жаттығуларының ашылу салтанаты өтті. Іс-шараның ресми бөлімінде қатысушы елдердің мемлекеттік әнұрандары шырқалды.

Ашылу салтанатында сөз сөйлегендер тәжірибе алмасу үшін бірлескен жаттығулардың маңыздылығына тоқталып, қатысушыларға сәттілік тіледі.

Одан кейін қонақтарға өзбек халық әндері мен басқа қатысушы елдердің әндері орындалған концерттік бағдарлама ұсынылды. Соңында оқу-жаттығуларға қатысушы әскерилер мінбе алдынан маршпен өтті.

Одан бөлек Самарқандта Орталық Азия елдері мен Әзірбайжан қорғаныс министрлерінің бірінші кездесуі өтеді.