ЖЕТІ ЖАСАР БАЛАҒА БІРЕГЕЙ ОТА ЖАСАЛДЫ

Ел Президенті Қ. Тоқаев қазақстандықтардың, оның ішінде балалардың денсаулығын сақтау мәселесіне ерекше мән беріп, пандемиядан кейін медицина саласын озық технология мен жетілдірілген жабдықтармен қамтамасыз етуді тапсырған болатын. Түркістан облысында да бұл мәселеге облыс әкімі ерекше назар аударып, денсаулық сақтау саласын барынша қамтамасыз етуге күш салуда. Соның арқасында заманауи аппаратуралар мен бірге білікті мамандар, дәрігерлер облыс аумағында көбейіп келеді.
Түркістан облыстық балалар ауруханасының комбустиолог-мамандары жеті жасар балаға бірегей ота жасады.
Бүлдіршін ыстық майға күйіп, бас терісінің 90%-ы күйік шалған. Ол 13 сәуір күні жедел жәрдем қызметімен Арыс қаласындағы ауруханаға жеткізілген. Науқасқа мамандандырылған көмек көрсету үшін Түркістан облыстық балалар ауруханасынан дәрігерлер шақыртылған. Облыс орталығынан келген білікті мамандар 16 сәуір күні күйік шалған баланы санавиация желісімен Түркістан облыстық балалар ауруханасына ауыстырған.
Облыстық балалар ауруханасының дәрігерлері науқасты отаға бір ай уақыт дайындап, антибактериалды, инфузиялық ем, күнделікті таңып-байлау емдерін жүргізген. 14 мамыр күні 7 жасар баланың басына аутодермапластикалық ота жасалды. Ота кезінде комбустиологтар Шолпан Кадирова және Бақыт Абдуманов баланың сан аймағынан терісін алып, басына тері қондырды. Ота сәтті өтіп, бала үйіне шығарылды. Дәрігерлер алдағы уақытта науқасқа оңалту емі жүргізілетінін жеткізді.