ЕЛ БІРЛІГІ ЭКОНОМИКАЛЫҚ ЖЕТІСТІКТЕРГЕ БАСТАР ЖОЛ
Өңірлердің әлеуметтік-экономикалық дамуының деңгейі көтеріліп, қуаттылығы арта түсуі үшін тікелей өнеркәсіптегі жағдай ғана емес қоғамдағы түсіністік, азаматардың рухани танымы, діни толеранттық, мәдени-спорттық жағдай мен жастардың белсендігінің де маңызы бар.
Сондықтан да, Түркістан облысы әкімінің орынбасары Сауран ауданына жасаған жұмыс сапары барысында үкіметтік емес ұйым жұмысымен танысып, зиялы қауым өкілдерімен, ақсақалдармен, дін өкілімен, жастармен де кездесті. Қоғамның әртүрлі санатындағы жандармен кездесу барысында олардың мемлекетіміздің дамуына, өңірдің әлеуметтік-экономикалық жетістіктеріне қал-қадерінше атсалысып, үлес қосуының маңызды екенін атап көрсетті.
Түркістан облысы әкімінің орынбасары Ертай Алтаев жұмыс сапарымен Сауран ауданына барды. Ең алдымен ауданға қарасты Шорнақ елді мекеніндегі «Қамқорлық орталығына» барып, аудандық үкіметтік емес ұйымның жұмысымен танысты. Онда зиялы қауым өкілдерімен кездесіп, ауданды дамыту бағытында жұмыс жоспарларымен бөлісіп, олардың ұсыныс, пікірлерін тыңдады.
Облыс әкімінің орынбасары Ертай Алтаев азат елдің егемендік жылдары жарқын жетістіктерді бағындырғанын, барлық игілік пен жетістік бірлік, этносаралық татулық ұғымдарымен тығыз байланысты екенін атап өтті. Жиында ақсақалдар өздерінің ұсыныс пікірлері мен мәселелерін ортаға салды.
Жұмыс сапарында өңір басшысының орынбасары «Дервиш Әлі» мешітінің имамымен кездесіп, ел бірлігі, рухани мәселе туралы пікір алмасты.
Сонымен қатар Ертай Кенжебекұлы аудандық мәдениет үйі мен кітапханада болып, ұжыммен кездесті. 2022 жылы пайдалануға берілген 120 орындық мәдениет үйінің жай-күйімен танысқан облыс әкімінің орынбасары өнер ошағының жұмысын жандандыруды тапсырды. Сондай-ақ кітапхана қорын молайту бағытындағы жұмыстарды күшейту керектігін ескертті.
Бұдан кейін аудандағы жаңадан салынып жатқан спорт кешенінің құрылыс алаңына барды. Құрылыс жұмыстарымен танысқан соң құрылыс жүргізуші мекеме өкілдеріне ең бастысы құрылыс сапалы соғылып, уақытында пайдалануға берілуі керектігін тапсырды. Сонымен қатар құрылыс материалдарының құны арзан емес, сапалы болуын ескертті. Аталған спорт кешені «Ауыл – Ел бесігі» бағдарламасы аясында салынып жатыр. Биыл құрылысы басталған спорт кешенінің жұмыс барысы жоспарға сай жүргізілсе, келесі жылы ауыл тұрғындары жаңа нысанның игілігін көреді.
Ертай Алтаев іссапар соңында «Жастар ресурстық орталығы» КММ-нің ғимаратында болды. Орталықта жастардың уақытын тиімді пайдалану мақсатында ашылған үйірмелер жұмысымен танысып, жауапты басшылар мен мамандарға жас буын өкілдеріне жан-жақты қолдау көрсетіп, қоғамдағы белсенділігін арттыруды тапсырды.
