ЖОБАНЫҢ ЖҮЗЕГЕ АСУЫ БАҚЫЛАУДА
Жас ұрпақ білімді де білікті болса мемлекеттің даму деңгейі мен экономикасы да жоғары болады. Сол себепті үкіметіміз балаларға білім беру саласының заманауи жабдықталып, жайлы болуына да жағдай жасап жатыр. Түркістан облысында биыл «Жайлы мектеп» ұлттық жобасы аясында 29 білім ұясы халық игілігі үшін қолданысқа беріледі деп жоспарланған. Оның екеуі Түркістан қаласында бой көтеріп жатыр. Құрылыс жұмыстарының барысы тұрақты бақылауда.
Таяуда облыс әкімінің орынбасары Нұралхан Көшеров Түркістан қаласында салынып жатқан мектептердің құрылыс алаңдарында болып, атқарылып жатқан жұмыстарды бақылады. Құрылыс басында мердігерлермен кездесіп, бірқатар тапсырма міндеттеді. Кедергілер орын алған жағдайда, дер кезінде хабарлап, әрекет етуді тапсырды.
Алдымен, облыс әкімінің орынбасары облыс орталығында салынып жатқан 2000 орындық жайлы мектептің құрылыс қарқынын тексерді. Бұл мектеп қаладағы №42 көшеде 4 гектар аумақта орналасқан. 4 қабатты нысанның құрылысын «Каратас Майнинг» ЖШС қолға алған. Ғимараттың жалпы ауданы – 20 147 м². Құрылыс жұмыстары 2023 жылдың қыркүйек айында басталған. Оқу ордасын жыл соңына дейін пайдалануға беру көзделіп отыр.
Ал, Түркістандағы «Яссы» шағынауданында салынып жатқан 1200 орындық білім ошағының құрылысын «YDA INSAAT SANAYI VE TICARET ANONIM SIRKETI» АҚ жүргізіп жатыр. Құрылысы 2023 жылдың желтоқсан айында басталған нысанды биыл жыл соңына дейін тапсыру жоспарланған.
Нұралхан Көшеров жауапты басшыларға жұмыстың сапасына баса назар аударуды, жұмыстарды белгіленген кестеден кешіктірмеуді, қажет болған жағдайда, жұмыс күшін арттыруды міндеттеді. Өйткені мемлекет басшысының тікелей тапсырмасымен қолға алынып жатқан бұл жобаның орындалуы облыс басшысының да тікелей қадағалауында болғандықтан оның мерзімінде әрі сапалы орындалуы маңызды.
