ӘЛЕУМЕТТІК НЫСАН ҚҰРЫЛЫСЫ МЕРЗІМІНДЕ, САПАЛЫ АЯҚТАЛУЫ ТИІС
Экономикасы қарқынды дамып жатқан мемлекеттердің халқының әлеуметтік-тұрмыстық жағдайы да жоғары болады. Яғни әлеуметтік-экономикалық дамуды кешенді жүргізіп азаматтарына жайлы өмір сүруге жағдай жасаған мемлекетте экономиканы қарқынды түрде дамытуға халқы белсене үлес қоса алады. Өйткені, олар экономика өскен сайын өздерінің әлеуметтік жағдайы да жақсара беретінін түсінеді. Мемлекет бұл бағытта, яғни әлеуметтік-экономикалық дамуды қарқынды жүзеге асыру мақсатында бағдарламалар мен жобалар қабылдап, өңірлер соларды жүзеге асыру бойынша жұмыс жүргізіп жатыр.
Әлеуметтік нысан халықтың алаңсыз өмір сүруін қамтамасыз ететін инфрақұрылымның бірден-бір бөлігі. Түркістан өңірі еліміздегі тұрғыны ең көп аймақ болғандықтан, облыс аумағында бұл нысандардың жетіспеушілігінің алдын алу мақсатында бірқатар жұмыстар қолға алынған. Күні кеше осы бағытта Түркістан облысы әкімінің орынбасары Бейсенбай Тәжібаевтың төрағалығымен жиын өтті. Жауапты басқарма басшылары өз салалары бойынша баяндама жасап, атқарылып жатқан жұмыстарға тоқталды. Аудан, қала әкімдерінің орынбасарлары да мәжіліске қатысып, өзекті мәселелерді ортаға салды.
Облыс әкімі Дархан Сатыбалды әлеуметтік саланы ілгерілету бағытындағы жұмыстарын қолдап келеді. Денсаулық сақтау нысандарының жай-күйін баяндаған басқарма басшысы бүгінгі таңда 49 жобаның 48-не сараптаманың оң қорытындысы алынғанын атап өтті. «Ауылдық денсаулық сақтауды жаңғырту» ұлттық жобасы аясында медициналық-санитариялық алғашқы көмек көрсету обьектілерінің біразында құрылыс басталып кеткен. Оның ішінде 2 нысанға биыл ҚР Ұлттық қор есебінен, 25-нің құрылысына ҚР Үкіметінің шұғыл шығындарға арналған резервінен қаржы қаралған. Ал 3 нысан «Ауыл – Ел бесігі» ұлттық жобасына ұсынылып отыр. 18-не биыл қаржы қарастыру үшін тиісті жұмыстар жүргізілуде. 1 нысанның құрылысы жеке инвестор қаражаты есебінен қолға алынған. Қазіргі таңда 30 нысанның құрылысы жүргізілуде. 3-еуінде былтыр басталған. Жер учаскесі бойынша туындаған бірқатар қиындықтар дер кезінде шешілді. Түзету жұмыстарына қарамастан құрылыс жұмыстары жүргізілуде. Сондай-ақ шілде айының соңында 13 нысанның мемлекеттік сатып алу процесі арқылы мердігерлері белгілі болғанымен, техникалық қадағалаушы мекемелер анықталуда. 5 нысан бойынша мемлекеттік сатып алу рәсімдері жүргізілуде. Аталған барлық нысанды инженерлік желілермен қамтамасыз ету жоспарланған.
Өңірде мемлекеттік 265 балабақша, 910 мектеп және 25 колледж бар. Мектептердің 753-і типтік, 157-і ыңғайластырылған ғимаратта орналасқан. Сондай-ақ 4 апатты білім ошағы тіркеліп, оларды жаңалау бойынша құрылыс жұмыстары қолға алына басталған. Жыл соңына дейін 3 мектеп пайдалануға беріледі. Оқушылар үш ауысыммен білім алып жүрген бес мектепке қажетті қосымша ғимараттардың құрылысы жүргізіліп жатыр.
Биыл сондай-ақ 321 білім мекемесінде жөндеу жұмыстары жүруде. Оның ішінде 106-сында жылу жүйесі табиғи газға ауыстырылады. Құрылыстар «Ауыл – Ел бесігі» бағдарламасы шеңберінде және облыстық бюджет есебінен жүзеге асырылып жатыр. Басым көпшілігінде жеңімпаздары ашық конкурс негізінде анықталып, өндірістік кестеге сәйкес тиісті жұмыстары жүргізілуде.
Жиын барысында әлеуметтік қызмет көрсету мекемелеріне қатысты да сауалдар талқыланып, алдағы міндеттер пысықталды. Бейсенбай Дәулетұлы ағымдағы, күрделі жөндеу жұмыстары мен жылу жүйесін табиғи газға ауыстыру жұмыстарын бекітілген кестеге сәйкес жүргізуді және құрылыс сапасын бақылауды тапсырды.
