ТҮРКІСТАН ОБЛЫСЫНДА МАҚТА ТЕРІМІ БАСТАЛДЫ
Ауыл шаруашылығы саласын қарқынды дамыту мемлекеттік экономикалық саясаттағы басты бағыттардың бірі болып саналады. Оның ішінде әрине дәстүрлі төрт түлік малды және егістік алқаптарында заман талабына сай технологияларды пайдалану, олардың өнімдерін инновациялық жолдармен өңдеп, тауарлық түрде саудалау мәселелеріне көп көңіл бөлініп келеді. Бұл салаларға бүкіл еліміздің өңірлері сияқты Түркістан облысында да ерекше назар аударылып отыр. Түркістан облысына бұларға қосымша басқа облыстарда өсірілмейтін, мақта өсіру саласына да үнемі көңіл бөлініп, мақта дақылының мол өнім беретін жетілдірілген тұқымдарын егуді, егістікті үнемшілдікпен суғару, жаңа технологиялар қолдана отырып аз аумақтан мол өнім өндіруге қол жеткізу бойынша, сол сияқты мақта кластерін енгізіп, дамытуға ерекше назар аударылуда.
Түркістан облысында мақта терім науқаны басталды. Бүгін облыс әкімі аппаратының апталық мәжілісінде осы науқанды сапалы ұйымдастыру мәселелері талқыланды. Түркістан облысының әкімі Дархан Сатыбалды аудан әкімдері мен Облыстық ауыл шаруашылығы басқармасы басшысының есептерін тыңдап, тиісті тапсырмалар берді.
– Біріншіден, шаруалар мен мақта қабылдаушы зауыттар арасында заңды келісімшарт болуы тиіс. Екіншіден, мақта терімін таза әрі сапалы ұйымдастыру маңызды. Мақта өсірілетін аудан, қала әкімдері бұл жұмысты тікелей бақылауға алып, тұрғындармен жүйелі жұмыс жүргізуі керек. Біздің алдағы мақсатымыз – мақтаның сапасын көтеру, жаңа технологияларды енгізу және мақта кластерін дамыту. Осы бағытта жұмыс жалғасады, – деді Дархан Сатыбалды.
Облыстық ауыл шаруашылығы басқармасының басшысы Нұрбек Бадырақовтың айтуынша, өңірде мақта теру жұмыстары жүріп жатыр. Өңірде 106,4 мың гектардан 300 мың тоннадан аса мақта жиналады деп күтілуде. Аудандарда техникалар мен жұмысшылар дайын. Мақтаның сапасын көтеру, мақта зауыттарының жұмысын жүйелеу, мақта өткізу нарықтарын кеңейту және өзге де мәселелер талқыланған жиында жауаптыларға тиісті міндеттер жүктелді.
Айта кетейік, Түркістан облысында мақта сапасын жақсарту мақсатында биыл жаңа тәсілмен 2,5 мың гектар алқапқа мақта егілді. Шетелдік тәжірибе негізінде қолға алынған жаңа су үнемдеу технологиясы өз тиімділігін көрсетіп отыр. Жаңа су үнемдеу технологиялары суды, электр қуатын, еңбек ресурстарын және минералды тыңайтқыштарды үнемдей отырып, гектарынан 60-65 центнерден өнім алуға мүмкіндік береді. Бұл облыстың орташа көрсеткішінен 2,5 есеге жоғары. Жалпы өңірде мақта шаруашылығын дамыту бойынша бірнеше мақта-тоқыма кластері құрылады, деп көзделген. Жобаны толық іске асыру нәтижесінде мақта бағасына тәуелділік жойылмақ.
Аппарат мәжілісінде жылыту маусымына дайындық және қоғамдық-саяси ахуал да талқыланды. Бұл жөнінде Түркістан облысы әкімінің бірінші орынбасары Зұлпыхар Жолдасов пен Түркістан облысы әкімінің орынбасары Ертай Алтаевтың баяндамалары тыңдалды. Облыста әлеуметтік нысандар мен білім, мәдениет, спорт, денсаулық сақтау мекемелері тиісті көмірмен қамтылуда. Жылу станцияларының дайындығы да бақылауға алынған.
