Мемлекет басшысының атына Құрбан айт мерекесіне орай келіп түскен құттықтау жеделхаттары
Президент Қасым-Жомарт Тоқаевтың атына Құрбан айт мерекесіне орай шет мемлекеттердің басшылары мен халықаралық ұйымдардың жетекшілерінен құттықтау хаттары келіп түсіп жатыр,- деп хабарлайды Trendnews.kz тілшісі akorda.kz сілтеме жасап.
Өзбекстан Президенті Шавкат Мирзиёев Мемлекет басшысы мен Қазақстан халқына ізгі тілегін жолдаған.
– Соңғы жылдары біздің батыл саяси ерік-жігеріміздің арқасында халықтарымыз арасындағы сан ғасырлық тығыз достық пен тату көршілік байланыстар мүлде жаңа одақтастық деңгейіне көтерілгенін айрықша атап өткім келеді, – делінген жеделхатта.
Қырғызстан Президенті Садыр Жапаров Құрбан айт адамдардың бойындағы мейірімділік, рақымшылық, төзімділік пен қайырымдылық секілді асыл қасиеттерді жан-жақты танытатын ерекше мейрам екенін айтқан.
– Бұл мереке бауырлас халықтарымызға бейбітшілік сыйлап, бақ-береке дарытып, қырғыз-қазақ стратегиялық серіктестігі мен өзара тиімді ынтымақтастығының белсенді дамуына ықпал ете беретініне сенімдімін, – деп жазылған құттықтауда.
Тәжікстан Президенті Эмомали Рахмон да Қасым-Жомарт Тоқаевты Құрбан айт мерекесімен құттықтады.
– Осы мерекенің ізгілік, толеранттылық, қайырымдылық және өзара қолдау сияқты рухани негізі алдағы уақытта да мемлекеттеріміздің және халықтарымыздың арасындағы достықты, екіжақты тиімді ынтымақтастықты одан әрі нығайтуға берік негіз қалайтынына сенемін, – делінген тәжік көшбасшысының құттықтауында.
Түрікменстан Президенті Сердар Бердімұхамедов Мемлекет басшысына зор денсаулық, мол бақыт, ал бауырлас қазақ халқына құт-береке тіледі.
Құрбан айт мейрамына орай өздерінің ізгі тілектерін Түркия Президенті Режеп Тайип Ердоған, Әзербайжан Президенті Ильхам Әлиев, Түрікменстан Халк Маслахатының Төрағасы Гурбангулы Бердімұхамедов, БАӘ Президенті шейх Мұхаммед бен Заид Әл Нахаян, БАӘ Вице-президенті, Премьер-министрі, Дубай Әміршісі шейх Мұхаммед бен Рашид Әл Мактум, Мысыр Президенті Әбдел Фаттах Әс-Сиси, Иордания Королі II Абдалла, Кувейт Әмірі шейх Мишааль әл-Ахмад әл-Джабер ас-Сабах, Кувейттің Тақ мұрагері Сабах Халид әл-Хамад ас-Сабах, Оман Сұлтаны Хайсам бен Тариқ, Бахрейн Королі Хамад бен Иса Әл Халифа, Палестина Президенті Махмуд Аббас, Алжир Президенті Әбделмәжид Теббун, Марокко Королі VI Мұхаммед, Иран Президенті Масуд Пезешкиан, Сомали Президенті Хасан Шейх Мохамуд, Татарстан Раисы Рустам Минниханов, Ислам ынтымақтастығы ұйымының бас хатшысы Хиссейн Брахим Таха және тағы басқалар жолдады.
