Қырғызстанда жел электр станциясының құрылысы басталды
Ыстықкөл облысындағы Балықшы қаласына «Росатом» жел электр станциясының құрылысына қажетті алғашқы құрамдас бөліктер жеткізілді. Бұл туралы «Росатом» ЖЭК бас директоры Григорий Назаров хабарлады.
«Біздің бірінші шетелдік жел электр станциясын салу жобасын жүзеге асыру жаңа белеске көтерілуде, құрамдас бөліктерді жеткізу осы жолдағы маңызды қадам болып табылады. Жасалған инвестициялық келісім аясында белгіленген кесте бойынша жүріп жатырмыз және келесі жылы жел электр станциясының алғашқы іргетасын құюды жоспарлап отырмыз. Жоба командасы жел электр станцияларын салу және пайдалану үшін барлық қажетті құзыреттерге ие. «Росатомның» Ресейде жүзеге асырған жел энергетикасы жобаларының жалпы қуаты қазірдің өзінде 1 ГВт-тан асты, біз жинақталған тәжірибені бізге дос елдерде қолдануға дайынбыз», — деді ол.
Айта кету керек, 2023 жылы жалпы қуаты 100 МВт жаңартылатын энергия объектілері өндіретін электр энергиясын Ыстықкөл облысына жеткізу туралы келісім, сондай-ақ республиканың басқа аймақтарында жалпы қуаты 100 МВт жаңартылатын энергия объектілері өндіретін электр энергиясын жеткізу туралы алдын ала келісім жасалған.
2024 жылдың наурыз айында «Росатом» ЖЭК пен Қырғыз Республикасының Энергетика министрлігі арасында қуаттылығы 1 ГВт-қа дейінгі жаңартылатын энергия объектілерін салу бойынша инвестициялық жобаны әзірлеу және іске асыру туралы келісімге қол қойылды. Келісімнің мәні Қырғыз Республикасында қуаты 1 ГВт-қа дейінгі жаңартылатын энергия объектілерін салу бойынша инвестициялық жобаны әзірлеу және іске асыру болып табылады.
Сондай-ақ, 2023 жылдан бастап денсаулық сақтауда ядролық технологияларды энергетикалық емес пайдалану саласында ынтымақтастық жүргізілуде. Атап айтқанда, Ұлттық онкология және гематология орталығының базасында онкологиялық және басқа да ауруларды диагностикалау мен емдеудің озық әдістері қолданылатын радиофармацевтикалық дәріхана, молекулалық бейнелеу және мақсатты терапия орталығын құру туралы болып отыр.
