Қырғызстан президенті жерасты алтын өндіру жобасын іске қосты
27 тамызда Қырғыз Республикасының Президенті Садыр Жапаров Ыстықкөл облысына жұмыс сапары барысында «Құмтөр» жерасты алтын өндіру жобасын іске қосты,- деп хабарлайды баспасөз қызметі.
Мемлекет басшысы Құмтөр алтын кен орнының мемлекет меншігіне қайтарылуы Қырғызстанның жаңару кезеңіндегі маңызды оқиғалардың бірі болғанын атап өтті.
Ол осыдан тура 3 жыл бұрын, 2022 жылдың 23 тамызында Құмтордың тағдыры ақыры Қырғызстанның пайдасына шешіліп, оның 100 пайыз мемлекеттік кәсіпорын болып жарияланғанын баса айтты. Осы тарихи дата қарсаңында бүгін Құмтөрде тағы бір оқиға орын алуда. «Құмтөр» кен орнында алтынды жерасты өндіру ресми түрде басталды. Құмтөрде жерасты алтын өндіру жобасының іске қосылуы қоршаған ортаны қорғау және бүгінгі күнге дейін сақталып келген мұздықтарды сақтау жолындағы маңызды қадам», — деді С.Жапаров.
Бұл жұмысты 20 жыл бұрын бастау керек болғанын, бірақ шетелдік компания бұрынғы билік пен жемқор шенеуніктермен жасырын сөз байласып, алтынды жер астынан игерудің орнына, бұл процесте мұздықтарды қиратып, арзанырақ әрі қарапайым жолды – ашық карьерді таңдағанын айтты.
Сөйтіп, бұрынғы шенеуніктердің мемлекет пайдасына зиянын тигізіп, жеке мүддесі үшін мұздықтарды құрбандыққа шалып, тарихта қара дақ қалдырғанын айтты.
«Біз әйгілі Давыдов пен Лысы мұздықтарының көпшілігінен айырылдық», — деді Садыр Жапаров.
Мемлекет басшысы Құмтөр мемлекетке қайтарылған күні оларға жерасты алтын өндіру жобасын бастау тапсырылғанын атап өтті.
Осылайша, отандық мамандардың көмегімен алғашқы жер асты кенін өндіру басталды.
Бүгінгі таңда 1600 метрге жуық туннельдер салынып бітті, «Құмтөр» тоннасы 5 грамнан астам алтын құрайтын бағалы кендерді өндіруге дайын.
Жерасты жобасы 17 жылға жұмыс істеуге есептелген, 147 тонна алтынның геологиялық қоры мемлекеттік балансқа енгізілген. Жерасты тау-кен өндірісінің басты артықшылығы — шамадан тыс бос жыныстарды шектеу.
«Ашық әдіспен 1 тонна кен өндіру үшін 60 тоннаға дейін бос жынысты өндіру қажет болды, бұл әлемдік стандарттардан артық. Құмторда жерастымен қатар ашық әдіспен алтын өндіру де жалғасады. Бірақ бірте-бірте жерасты қазбаларына басымдық беріледі. Құмтордың болашағы зор, ол ел мен халықтың игілігі үшін әлі 40-50 жыл жұмыс істейтін болады», — деді Президент өз сөзінде.
Сондай-ақ, ол жол, мектеп, балабақша салу, жалақыны, зейнетақы мен жәрдемақыны арттыру, әскери және басқа да заманауи техникаларды сатып алу, бір сөзбен айтқанда, елімізде болып жатқан оң өзгерістердің барлығы Құмтөрден түсетін қаражат есебінен қаржыландырылатынын жеткізді.
Садыр Жапаров фактілерді келтірді: 2021 жылдың мамыр айынан бастап бүгінгі күнге дейін кәсіпорынның жалпы табысы 3 миллиард 445 миллион АҚШ долларын құрады.
Қырғызстан бюджетіне салық және басқа да төлемдер түрінде 891,6 миллион доллар түсті.
Осы уақыт ішінде 54 тоннадан астам алтын өндірілді.
28 жыл бойы Құмторды шетелдік компания басқарса, Қырғызстан 100 миллион доллар ғана дивиденд алған. Ал соңғы 3 жылда 441 миллион доллар дивиденд алдық.
«Назар аударыңыз және салыстырыңыз: 28 жылда – 100 миллион, ал 3 жылда біз – 441 миллион доллар дивиденд аламыз!»,- деді Президент.
Мемлекет басшысы жерасты өндіруден бөлек, құрамында жүз тоннадан астам алтын бар қалдық қоймасын өңдеу жұмыстары басталатынын атап өтті. Бұл табыс әкеліп қана қоймай, экологиялық қауіпті жояды.
Сонымен қатар, ол жұмыс басталып кеткен Тоголок кен орны толығымен Құмтөрге берілгенін баса айтты. Жанғарт учаскесінде де геологиялық барлау жұмыстары сәтті жалғасып отырғанын атап өтті.
«Осылайша, еліміздің тау-кен өнеркәсібіндегі өндіріс жаңа деңгейге көтеріліп, халықтың бақуатты болашағының аса маңызды күшіне айналуда. Ал бұдан былай барлық кен орындары тек Қырғызстанның мүддесі үшін пайдаланылатын болады», — деді Садыр Жапаров.
Бұдан кейін Мемлекет басшысы орталық карьерде болып, кәсіпорынның құрылымдық бөлімшелерінің жұмысымен танысты.
