Мемлекет басшысы Бейжіңде бірқатар кездесулер өткізді
Ақорда сайты Қасым-Жомарт Тоқаевтың CNPC басшылығын қабылдағанын хабарлады. Қазақстанның мұнай-газ саласындағы ұзақ мерзімді стратегиялық серіктесі Қытай ұлттық мұнай-газ корпорациясымен бірлескен ауқымды жобаларды одан әрі ілгерілетуге мүдделі. Бұл туралы Мемлекет басшысы CNPC директорлар кеңесінің төрағасы Дай Хоу-Лянмен кездесуінде айтты.
Мемлекет басшысы Бейжіңде China Energy Engineering Group компаниясының бас директоры Ни Чжэнмен кездесті. Қасым-Жомарт Тоқаев пен Ни Чжэн ынтымақтастықтың негізгі бағыттары мен бірлескен жобаларды дамытудың жай-жапсарын талқылады. Әңгімелесу барысында электр желілері инфрақұрылымын жаңғырту мен кеңейтуге, дата-орталық салуға, сондай-ақ қалдықтарды қайта өңдеу арқылы электр қуатын өндіру жобасын жүзеге асыруға қатысты мәселелерге назар аударылды. Energy China компаниясы Қазақстанның солтүстігі мен оңтүстігін жалғайтын тұрақты электр желілерінің құрылысын жүргізуге ниет танытып отыр. Сондай-ақ жаңартылатын энергетика жобаларын іске асыру мүмкіндігін қарастырады. Fortune Global 500 рейтингіне кіретін халықаралық ірі компания жел, күн және жылу қуатын өндіру, ядролық энергетика, су үнемдеу мен гидроэнергетика салаларында жұмыс істейді.
Мемлекет басшысы Азия инфрақұрылымдық инвестициялар банкінің президентімен де кездесті. Президент Қазақстанның «жасыл» және интеллектуалды технологияларды дамыту жобаларын ілгерілету бойынша Банк қызметін кеңейтетін өңірлік алаңға айналуға дайын екенін атап өтті. Банк еліміздегі жалпы сомасы 2 миллиард доллардан астам стратегиялық маңызды жобаларға қолдау көрсетті. Оның ішінде жел электр станциясының құрылысы, Жезқазған-Қарағанды тас жолының учаскесі, Көкшетаудағы аурухана бар.
Сонымен қатар, Қасым-Жомарт Тоқаев Бейжіңде Huawei директорлар кеңесінің төрағасы Хуа Лянмен IT салаларын дамыту және бірлескен жобаларды іске қосу мәселелерін талқылады. Жасанды интеллект, үлкен деректер және болашақтың басқа да технологиялары саласында қазақстандық мамандарды дайындауға ерекше назар аударылды. Huawei бүгінде 170 елде жұмыс істейді және дүние жүзінде үш миллиардтан астам пайдаланушыға қызмет көрсетеді.
Сондай-ақ қытайлық Sany Group компаниясы Қазақстанда арнайы техника шығаруды қолға алмақшы. Бұл туралы президентпен кездесуінде корпорацияның директорлар кеңесінің төрағасы Сян Вэнбо мәлімдеді. Тараптар машина жасау, жасыл энергетика және ғылыми әзірлемелер саласындағы жобаларды талқылады. Президент China Energy Engineering Group бас директоры Ни Чжэньмен кездесуінде электр желілері инфрақұрылымын жаңғырту және кеңейту мәселесін талқылады. Тараптар деректер орталығын салу перспективаларына, сондай-ақ электр энергиясын кейіннен өндіру арқылы қалдықтарды қайта өңдеу жобасын іске асыруға тоқталды.
Президент Қытай ұлттық ядролық өнеркәсіп корпорациясының (CNNC) бас директоры Шэнь Яньфэнді қабылдады. ️Қасым-Жомарт Тоқаев Шэнь Яньфэнді Қытай атом өнеркәсібіне 70 жыл толуымен құттықтап, бұл мерейлі меже аталған саладағы диалогты одан әрі нығайтуға жол ашатынын атап өтті. ️Мемлекет басшысы Төраға Си Цзиньпинмен жүргізген келіссөз барысында атом индустриясындағы ынтымақтастыққа айрықша мән беріліп, маңызды уағдаластықтарға қол жеткізілгенін айтты. ️Президент тәжірибесі мол әрі технологиясы озық CNNC компаниясымен бірлескен жобалар, соның ішінде еліміздегі екінші атом электр стансасының құрылысы табысты жүзеге асырылатынына сенім білдірді.
Қасым-Жомарт Тоқаев бүгін теміржол машина жасау саласындағы әлемдік көшбасшы CRRC директорлар кеңесінің төрағасымен де кездесті. Президент өткен жылдың қазан айында Бейжіңге сапарынан кейін Қытай корпорациясымен ынтымақтастық жаңа деңгейге көтерілгенін атап өтті. Өзара әрекеттестіктің жаңа кезеңі тек сатып алуды ғана емес, сонымен қатар Қазақстандағы өндірісті локализациялауды да көздейді. Бұл отандық машина жасауды дамытуға қуатты серпін бермек.
