Мемлекет басшысы ҰҚШҰ Ұжымдық қауіпсіздік кеңесінің отырысына қатысты
27 қарашада Бішкекте Қырғыз Республикасының Президенті Садыр Жапаровтың төрағалығымен Ұжымдық қауіпсіздік шарты ұйымының (ҰҚШҰ) Ұжымдық қауіпсіздік кеңесінің (ҰҚК) сессиясы өтті.
Қазақстан Республикасының Президенті Қасым-Жомарт Тоқаев Бішкекте өтіп жатқан Ұжымдық қауіпсіздік шарты ұйымы Ұжымдық қауіпсіздік кеңесінің кезекті отырысына қатысты.
Саммитке Қырғыз Республикасының Президенті Садыр Жапаров, Беларусь Республикасының Президенті Александр Лукашенко, Ресей Федерациясының Президенті Владимир Путин, Тәжікстан Республикасының Президенті Эмомали Рахмон қатысты.
Мемлекеттер басшылары Ұйымға мүше елдердің ұжымдық қауіпсіздігін қамтамасыз етудің өзекті мәселелерін қарастырып, биылғы Ұжымдық қауіпсіздік шарты ұйымы жұмысының негізгі бағыттарын қорытындылады. Сондай-ақ алдағы кезеңге арналған басымдықтарды анықтады.
ҰҚШҰ Бас хатшысы Иманғали Тасмағамбетов Ұжымдық қауіпсіздік шарты ұйымы мүшелерін халықаралық және аймақтық қауіпсіздіктің өзекті мәселелері және сессияаралық кезеңдегі ҰҚШҰ қызметінің негізгі нәтижелерімен таныстырды. Бас хатшы Ұйымның қызметі туралы үш жылдық есепті ұсынды. Ұжымдық қауіпсіздік шарты ұйымы мүшелері Иманғали Тасмағамбетовке Ұйымды нығайтуға қосқан елеулі үлесі және Бас хатшы ретіндегі жемісті жұмысы үшін шын жүректен алғыс білдірді. Мемлекет басшылары Қырғыз Республикасының Ұжымдық қауіпсіздік шарты ұйымы төрағалығының өткен кезеңдегі басымдықтарының жүзеге асырылуын жоғары бағалады.
Күн тәртібінде жақын болашаққа арналған ұжымдық қауіпсіздік архитектурасын қалыптастыратын стратегиялық құжаттар пакетін қарауға баса назар аударылды. Олардың ішінде:
Ұжымдық қауіпсіздік шарты ұйымына мүше мемлекеттерінің 2026-2030 жылдарға арналған есірткіге қарсы стратегиясы;
Ұжымдық қауіпсіздік шарты ұйымына мүше мемлекеттерінің әскери ынтымақтастығын дамытудың 2026-2030 жылдарға арналған жоспары.
Ұйымның аналитикалық әлеуетін нығайту үшін Ұжымдық қауіпсіздік кеңесі ҰҚШҰ хатшылығы құрамында Ақпараттық-талдау дирекциясын құру туралы шешім қабылдады. Жаңа бөлімше Ұжымдық қауіпсіздік шарты ұйымы жауапкершілігі аймағындағы жағдайды кешенді бақылау мен болжауды жүзеге асыруға арналған.
Сессияның нәтижелерінің бірі ҰҚШҰ Ұжымдық қауіпсіздік кеңесінің декларациясын қабылдау болды. Бұл негізгі құжат мүше мемлекеттердің аймақтық және жаһандық қауіпсіздіктің өзекті мәселелері бойынша біріктірілген ұстанымдарын көрсетеді және Ұйымды одан әрі нығайту мен дамыту жолдарын белгілейді.
Мемлекеттер басшылары халықаралық және өңірлік қауіпсіздіктің өзекті мәселелері жөнінде пікір алмасты.
Ұжымдық қауіпсіздік кеңесінің шешімімен 2026 жылы Ұйымға төрағалық ету Ресей Федерациясына өтеді.
Сессия барысында Ресейдің 2026 жылға арналған Ұжымдық қауіпсіздік шарты ұйымы төрағалығының басымдықтары жарияланды. Ресей тарапы Ұйымның ақпараттық-талдау қызметін дамыту, терроризмге қарсы күресті және басқа да сынақтар мен қауіптерді күшейту, ұжымдық қауіпсіздік күштерін нығайту және есірткі бизнесіне қарсы күрес, соның ішінде «Арна» есірткіге қарсы операциясын өткізу сияқты негізгі бағыттарды атап өтті. Ресей тарапы алдағы төрағалыққа «Көпполярлы әлемдегі ұжымдық қауіпсіздік: ортақ мақсат – ортақ жауапкершілік» ұранын ұсынды.
Ұжымдық қауіпсіздік кеңесі Таалатбек Масадыковты 2026 жылдың 1 қаңтарынан 2028 жылдың 31 желтоқсанына дейін үш жылдық мерзімге Ұжымдық қауіпсіздік шарты ұйымы Бас хатшысы етіп тағайындады.
