ӨҢІРЛІК ӨНІМ ӨНДІРУ ЕКІ ЕСЕГЕ АРТПАҚ

«Қуатты өңірлер – Ел дамуының драйвері» ұлттық жобасын аймақтарда жүзеге асыру Мемлекет басшысының облыс басшылығының алдына қойған басты міндеттерінің бірі болып саналады. Түркістан облысында өңірдің әлеуетін арттыруға бағытталған көптеген жобалар мен бағдарламалар барлық салалар бойынша іске асырылуы облыс әкімінің тікелей назарында. Облыс әкімі мемлекеттік бағдарламалар мен жобаларға қоса облыстық жобаларды да енгізіп, өңір экономикасының қарқынын арттыруға түркістандықтарды жұмылдыруда. Соның арқасында облыстың әлеуметтік-экономикалық дамуы жыл сайын жоғарылай түсуде. Өңірдің қуаты да артып келеді.
Түркістанды рухани астана ретінде дамыту шаралары өңір экономикасына тың серпін берді. Негізгі макроэкономикалық көрсеткіштер өсімі қалыптасты. Жалпы өңірлік өнім 6 жылда 2,5 есеге өсіп, былтыр 4,2 трлн теңгеге жетті. Биыл 6 трлн теңгеге жеткізу жоспарланған. Жалпы өнеркәсіп өнім көлемі 2018 жылмен салыстырғанда 2,3 есеге артып, өткен жылы алғаш рет 1 трлн теңгені құрады.
Былтыр өңдеу өнеркәсібінде жоспарланған 20 инвестициялық жоба толық іске қосылып, 600-дей жаңа жұмыс орны ашылды. Облыс орталығында 250-ден астам заманауи ғимарат бой көтерді. Тұрғын үйлер, мәдениет, спорт, білім, медицина, инфрақұрылым нысандары ел игілігіне берілді.
Облыстың жалпы өңірлік өнім көлемін екі есе арттыруға бағытталған ауқымды жұмыстар жүргізіліп жатыр. Экономиканы әртараптандырып, жұмыс орындарын ашуға, кіріс көздерін ұлғайтуға күш салынған. Өндіріс, ауыл шаруашылығы, туризм, мәдениет, кәсіпкерлік салаларын дамытуға басымдық берілген.
Өндірісті дамыту мақсатында бірнеше маңызды жобаларды іске асыру жоспарланған. Атап айтқанда, Ордабасы ауданында ірі мұнай өңдеу заводы, Түлкібас ауданында химиялық кешен, Созақ ауданында фосфорит өндіретін завод, Сайрам ауданында қуаттылығы 1 000 МВт бу-газ қондырғысы, Келес ауданында аумағы 51 га ірі өнеркәсіптік жылыжай секілді ірі жобалар жүзеге асырылатын болады.
Өңір экономикасының басты саласы ауыл шаруашылығының өнім көлемі 2018 жылмен салыстырғанда 2,1 есе артып, 2023 жылы 1,2 трлн.теңгеден асып, республикада көш бастады (2018 ж. 544,3 млрд.теңге). Егістіктік әртараптандыру нәтижесінде көкөніс, бақша өнімдерінен рекордтық 3,3 млн. тонна өнім жиналды. Нарықты отандық өніммен қамтамасыз ету мақсатында өткен жылы жоспарланған 25 жоба толық жүзеге асты (17,1 млрд.тг., 624 жұмыс орны).
Жоғарыдағы көрсеткіштер Түркістан облысының экономикасы дамып, қуатының арта түскенінің дәлелі.