ТЕРЕҢДЕТЕ ӨҢДЕУ БАҒЫТЫНДА ЖҰМЫС ЖҮРУДЕ
«Қуатты өңірлер – ел дамуының драйвері» ұлттық жобасын және басқа да Мемлекеттік бағдарламаларды тиімді пайдалана отырып өздерінің кәсіпкерліктерін дамытушы түркістандық азаматтар облыстың барлық қала, аудандарында жетерлік. Солардың халық шаруашылығының барлық салаларында кәсіптерін ашып, өндірістерінде өнім өндіруінің арқасында Түркістан облысында отандық өнім өндіруші өндіріс орны жетерлік. Соның ішінде Сайрам ауданының кәсіпкерлері бүгінде өз кәсібін дөңгелетіп отырғаны белгілі. Мәселен ет өндірісімен айналысатын «Nurym Group» ЖШС тағы бір ерекше жобаны қолға алған. Енді мұнда түйіршіктелген жем жасау өндірісі іске қосылады.
Аталған кәсіпорынның қызметі негізінен мал шаруашылығы саласы болып саналады. Жаңа жоба негізінен ет өндірісін кеңейтуге бағытталған. Атап айтқанда, мал шаруашылығы, ет өңдеу, ет саудасы, жем өндірісі. Ал құрылымы бордақылау алаңы мен мал базасынан, қоймалардан тұрады. 2018 жылы жұмысын бастаған кәсіпорында ірі қара өсіріледі. Бүгінде 6 мыңға жуық ірі қара мал бордақылануда. 2021 жылы компания 5 мың бас бұқа сатып алған. Өңдеу қуаттылығы жылына 5 мың тонна ет. Негізінен Иран мен Өзбекстанға ет экспортталады.
Жауапкершілігі шектеулі серіктестікте инновациялық технологияларды қолдана отырып, түйіршіктелген жем жасау өндірісі іске асырылуда. Жобаның құрылысына жауапты мердігер компания зауыттың құрылыс жұмыстарына кірісіп кетті. Аталған зауытта сағатына 20 тонна түйіршіктелген жем шығарылмақ. Өндіріс орны жанынан арнайы зертхана мен 20 мың тоннаға дейін мал азығын сақтайтын қойма салу да жоспарланған. Алдағы уақытта зауытта бірнеше азамат тұрақты жұмыспен қамтылады деп жоспарлануда.
Оған қоса аудандағы қасапханалардан шыққан қалдықтарды терең өңдеу мәселесі де қолға алынбақ. Тағы бір маңызды жоба – ет өңдейтін зауыт. Оның құрылысы биыл басталады. Кәсіпорында күніне 1000 ірі қара мал сойылады деп жоспарлануда. Зауыттың өзгелерден ерекшелігі, онда қасапханалардағы шикізат қалдықтарын терең өңдейтін орын қарастырылған. Малдың қаны мен сүйегін, ішек-қарнын, терісін де пайдаға асыратын жаңа кәсіпорын 2025 жылы іске қосылады деп жоспарланып отыр. Бұл жоба аясында қосымша тұрақты жұмыс орындары ашылатын болады.
«Қайып-Ата» жауапкершілігі шектеулі серіктестігі де аудандағы тәжірибелі еңбек ұжымдарының қатарына жатады. Мұнда шамамен 40 адам жұмыс істейді. 2011 жылы тіркелген «Қайып-Ата» кәсіпорны «Қазақстанның Ет одағының» мүшесі, «Nurym Group» ЖШС құрамына кіреді. Етті өңдеу және консервілеу, ірі қара мен буйвол өсіру, көкөністер мен жемістерден басқа азық-түлік тауарларын сақтау, ветеринарлық қызмет секілді бағыттары бар.
Компания құрылымына Қазығұрт ауданында 6 мың басқа арналған ірі қара малын бордақылау алаңы, Сайрам ауданындағы бордақылау кешенінде 10 мың басқа арналған бордақылау алаңы, шоғырланған жем өндіруге арналған жем цехы, тоңазытқыш және сою цехы, Қазығұрт ауданындағы 20 мың басқа арналған ұсақ мал бордақылау алаңы және «ОҚО-ЭКО-FOOD» ет комбинаты кіреді. Сиыр еті, жылқы еті, қой еті халал және HASP стандарттарына сәйкес өндіріледі. «Бизнестің жол картасы 2020» субсидиялау бағдарламасымен ашылып компания бүгінде осында ауқымды көлемде дамып отыр. Алдағы кезде жұмыс көлемін ұлғайтумен қатар саладағы озық технологияларды өндіріске енгізіп өндірілген өнімді тереңдете өңдеу бағытындағы жұмыстар жалғаса бермек. Ал бұл жұмыстар Түркістан өңірінің экономикалық қуатын арттыру арқылы ел дамуына қарқын қоса түспек.
