БАЛАЛАР МЕН ЖАСӨСПІРІМДЕРДІҢ ҚАУІПСІЗДІГІ НАЗАРДА
Елімізде ана мен баланы қолдауға арналған бағдарламалар жүзеге асырылуда. Сол сияқты балаларды қолдау мен олардың қауіпсіздігін қамтамасыз ету бойынша да жұмыстар жасалуда. Дегенмен, Мемлекет басшысы Қасым-Жомарт Тоқаев екінші қыркүйектегі «Әділетті Қазақстан: заң мен тәртіп, экономикалық өсім, қоғамдық оптимизм» деп аталатын қазақстандықтарға арналған жаңа Жолдауында жас ұрпақ мәселесіне байланысты тағы да айтты. Мемлекет басшысының айтуынша, Жолдауда әлеуметтік салаға, соның ішінде балаларды қорғау ісіне айрықша көңіл бөлінген. Президент халықтың әл-ауқатын жақсартуға септігі тиетін басқа да көптеген шара қолға алынғанына назар аударып, арқаны кеңге салуға болмайтынын, алдымызда әлі талай ауқымды жұмыс тұрғанын да айтты.
Түркістан облысында жас ұрпақ мәселесі облыс әкімінің бақылауынан тыс қалған емес. Облыс бойынша балаларды қолдау мен олардың қауіпсіздігі бойынша нақты жоспарлы жұмыстар үздіксіз жүзеге асырылып келеді.
Келес ауданы әкімінің орынбасары Даурен Сариевтің төрағалығымен аудан әкімдігінің жанындағы кәмелетке толмағандардың ісі және олардың құқықтарын қорғау жөніндегі комиссия отырысы өткізілді. Жиынға аудандық кәмелетке толмағандардың ісі және олардың құқықтарын қорғау жөніндегі комиссия мүшелері, ауданның білім бөлімінің қызметкерлері қатысты.
Аталған жиында комиссия мүшелері жасөспірімдердің бос уақытын тиімді пайдалану, құқықтарын жүзеге асыру, сонымен қатар сәтсіз отбасылар және онда тәрбиеленіп жатқан кәмелетке толмағандармен атқарылып жатқан жұмыстары жөнінде баяндады. Баяндама барысында балабақшадағы балалардың тамақтануы және мектепке дейінгі ұйымдарға қойылатын санитариялық-эпидемиологиялық талаптар бойынша да сөз етілді. Күн тәртібіндегі мәселелер бойынша комиссия төрағасы мен мүшелері ұсыныс-пікірлер арқылы тиісті шараларды қабылдап нақты жоспарлар бекітті.
Жиын соңында комиссия төрағасы балалардың рухани мәдениетін, жоғары моральдық және азаматтық сапасын дамыту басты міндеттемелердің бірі екендігін тілге тиек етіп, жасөспірімдер мен оқушылардың қауіпсіздігі, олардың құқықтарының қорғалуы жауапты мекемелердің ұдайы назарында болу қажеттігін айтты.
