КӨШПЕНДІЛЕР ОЙЫНЫНЫҢ ҚАХАРМАНДАРЫНА ҚҰРМЕТ КӨРСЕТІЛДІ

Астанада V Дүниежүзілік көшпенділер ойындары өтті. Дүбірлі сынға әлемнің 89 елінен 2500-ге жуық спортшы қатысты. Айтулы бәсекеде Қазақстан құрамасының спортшылары 43 алтын, 32 күміс және 37 қола жүлде еншіледі. Ортақ жеңіске Түркістан облысынан барған 32 спортшы да үлес қосты. Өңір спортшылары 16 алтын, 10 күміс, 5 қола жүлдені иеленіп, республикада өздерінің үздік екендерін дәлелдеді. Бүгін Түркістан облысының әкімі Дархан Сатыбалды Көшпенділер ойындарының жеңімпаздары мен жүлдегерлерін қабылдап, құрмет көрсетті.
– Қазақ еліндегі дүбірлі дода жоғары деңгейде ұйымдастырылды. Халқымыздың ғана емес, көшпенділердің тарихы, мәдениеті, спорты таныстырылып, абыройымыз аспандады. Түркістан облысының спортшылары өте табысты өнер көрсетіп, жүлде саны бойынша өңірлер арасында үздік болды. Елдің еңсесін көтердіңіздер. Көк туымызды желбіреткен қырандарымызға алғысымды білдіремін! Біздің білекті, жүректі батырларымыз Көшпенділер ойындарының қаһармандарына айналды. Сіздерге зор денсаулық, отбасыларыңызға амандық, бақ-береке тілеймін! Мемлекет Басшысы Қасым-Жомарт Кемелұлы халыққа арнаған Жолдауларында ұлт денсаулығын сақтау, спортты дамыту мәселесіне ерекше көңіл бөліп келеді. Облыста тұрғындарымыздың салауатты өмір салтын қалыптастыру және бұқаралық спортты дамыту мақсатында соңғы 3 жылда 115 спорт нысаны пайдалануға берілді. Олардың арасында «Түркістан Арена» стадионы, «Мұз сарайы», «Теннис орталығы», «Olympic Center» спорт кешені және өзге де нысандар бар. Биыл да көптеген спорт нысанын пайдалануға беру көзделіп отыр. Бұдан бөлек, Түркістан қаласында заманауи үлгідегі атшабар салу жоспарлануда. Ұлттық спорт түрлеріне қолдау көрсету жалғасады. Қазақ елінің спорт саласындағы жетістіктері мен табыстары арта берсін! – деді Дархан Сатыбалды.
Көшпенділер ойындарының жеңімпаздарына – 1 млн, күміс жүлдегерге – 700 мың және қола жүлдегерлерге 500 мың теңгенің сертификаттары тапсырылды.
Аударыспақтан әлемнің мықтысы, Көшпенділер ойындарының жеңімпазы Сырым Ізбасаров спортшылар атынан өңір басшысына қолдауы үшін алғысын білдірді.
Түркістан облысының 4 жігіті көкпар құрамасы сапында чемпион атанса, аударыспақтан 5 алтын, 1 күміс медаль еншіледі. Сонымен бірге овари, жамбы ату, қазақ күресі, күштілер сайысы, теңге ілу, асық ату спорт түрлерінен де қоржынға алтын жүлделер түсті. Көк бөрі, ордо, алыш, кураш, құсбегілік, жамбы ату спорт түрлерінен күмістер мен қола медальдар бұйырды.
Чемпиондар қатарында Айкөз Ералхан, Батыр Бексауыт (жамбы ату), Айжан Жылқыбаева (қазақ күресі), Азамат Мақұлбеков (күштілер сайысы), Рахат Қамбаров (теңге ілу), Әсел Далиева (овари), Амандос Айтқұлов (асық ату), Ермек Құралбай, Алмат Ләтіпбек, Дарын Өткелбай, Сырым Ізбасаров, Біржан Қосалиев (аударыспақ), Дәулет Айтан, Арман Жамалбеков, Абылайхан Нышанбеков және Әділет Мамыт (көкпар) бар.
Арыс жұрты көшпенділер ойындарының жүлдегеріне құрмет көрсетті. Алыптар сайысында ел намысын абыроймен қорғаған жеңімпаз жерлесіміз Азамат Мақұлбековты Шымкент әуежайынан жерлестері салтанатпен күтіп алды.
Дүйім жұрт көз тіккен додада алып күш иесі намысты қолдан бермеуге барынша тырысып бақты. Жерлесіміз жүлделі жолдан жаңылмады. Алыптар сайысына қатысқандардың ең жеңілі болса да, жарты тонна арбаны сүйреген арыстық Азамат Мақұлбековтің қара күшіне тамсанғандар көп болды. Ол абсолют салмақ дәрежесінде сынға түскен 16 елден келген алып спортшылар арасында бес сайыстан мықты шығып, алтын жүлдені жеңіп алған болатын.
Батырды әуежайдан қарсы алуға облыстық спорт басқармасы басшысының м.у.а. Алмас Нақыпбеков, қала әкімінің орынбасары Алмаз Сұлтанов, қалалық мәслихат төрағасы Қайрат Ахметов, чемпионның ата-анасы мен туыстары, белгілі спорт шеберлері мен қалалық мәслихат депутаттары, жерлестері қатысты.
Палуанның иығына шапан жауып, арыстың жомарт кәсіпкерлері дәстүрге сай ат мінгізді.
«Жерлестерімнің қолдауы мен ыстық ықыласы өте керемет болды. Аллаға шүкір деймін. Жеңісімді қазақ еліне арнаймын. Алда әлі бағындырар белестер көп», — деген палуан, жерлестірен алғысын білдірді.
Құрмет онымен тоқтамай, батырды туған қаласына кіре берістегі Дендросаябақта да жерлестері жылы лебіздерін білдіріп, ұлттық нақыштағы салтанатты шара ұйымдастырды. Дәстүрге сай қымыз бен бауырсақ ұсынып, ағайын-туыс, дос-жаран, қала тұрғындары жеңімпазды шын жүректен қарсы алды. Жерлестері тағы бір мәрте шапан жауып, оның ерлігін мақтанышпен атап өтті.
Азамат Мақұлбековтың жеңісі тек Арыс қаласының ғана емес, барша Қазақстанның абыройы болды. Көшпенділер ойынында көрсеткен қайсарлық пен күш-қайраты жас ұрпаққа үлгі болары сөзсіз.