ЖҰМЫСТЫ ЖАНДАНДЫРЫП, БАҚЫЛАУДЫ КҮШЕЙТУ ҚАЖЕТ
Елімізде «Жаңа Қазақстан» құру бастамасымен бірге мемлекеттің дамуына тежеу болып отырған сыбайлас жемқорлықпен күрес те белсенді жүргізіле бастады. Оның үстіне Мемлекет басшысының биылғы Жолдауының «Әділетті Қазақстан: хаң мен тәртіп…» деген атауының өзі республикада әділеттілік, заң мен тәртіптің үстемдігі басталып келе жатқанын көрсетсе керек. Яғни мемлекет бәсекеге қабілетті елдердің қатарына қосылу үшін экономиканы қарқынды дамытуда сыбайлас жемқорлық сияқты дамуды тежеп, қоғамның бірліғіне нұқсан келтіретін зиынды құбылысқа қарсы күресті күшейте бермек. Сыбайлас жемқорлыққа қарсы күресте қоғамның оған деген төзбестігін қалыптастырып, адамдардың сыбайластықпен заңдылықты бұзуының қатаң жазаланатынын түсінуі үшін мекемелерде, халық арасында сыбайлас жемқорлыққа қарсы түсіндіру, ақпараттандыру, ол үшін берілетін жазаларды жұртшылыққа таныстыру сияқты қылмыстың алдын алуға септік етер шаралар көптеп жүргізілуі керек.
Түркістан облысы әкімдігі жанындағы сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өтті. Оған Түркістан облысының әкімі Дархан Сатыбалды, Қазақстан Республикасы Сыбайлас жемқорлыққа қарсы іс-қимыл агенттігінің Түркістан облысы бойынша департаментінің басшысы Мұрат Төлеубаев, құқық қорғау органдары мен басқармаларының басшылары мен аудан,қалалардың әкімдері қатысты. Күн тәртібінде үш мәселе қаралды.
Алдымен жұмыспен қамту және әлеуметтік бағдарламалар саласындағы сыбайлас жемқорлық тәуекелдеріне жүргізілген сыртқы талдау қорытындылары туралы Қазақстан Республикасы Сыбайлас жемқорлыққа қарсы іс-қимыл агенттігінің облыстық департаментінің Превенция басқармасының басшысы Нұрлан Құдайбергенов пен облыстың жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаеваның баяндамалары тыңдалды.
Сыртқы талдау қорытындылары бойынша субсидияланатын жұмыс орындарына қаражаттың тиімсіз жұмсалу фактілері, атаулы әлеуметтік көмек бойынша негізсіз төлемдерді аудару, жеке көмекшілердің қызметтерін ұсыну кезінде, оңалтудың техникалық құралдарын жеткізу кезінде сыбайлас жемқорлық тәуекелдері анықталғаны, сондай-ақ оларды жою жөнінде тиісті ұсынымдар енгізілгені баяндалды.
Облыс әкімі сыбайлас жемқорлыққа қарсы күрестің маңызына тоқталды.
«Осы саладағы барлық кемшіліктерді жоюды тапсырамын. Біз білім беру саласын мұқият зерттеп, қаржылық бұзушылықтарды анықтадық. Енді жауапты құқық қорғау органдарымен бірге әлеуметтік саланың барлық мекемелеріне тексеру жүргізілуде. Барлық салаларда қаржылық жағдайға мониторинг жүргізіледі. Мемлекет бюджетінің әрбір тиыны тиімді болуы және өз мақсаттары үшін, ел мүддесі үшін жұмсалуы тиіс. Заңсыздыққа жол берілмейді. Басқармалардың басшылары, аудандар мен қалалардың әкімдері сыбайлас жемқорлыққа қарсы іс-қимыл жөніндегі жұмысты жандандырып, бақылауды күшейту қажет. Біз бұл мәселені үнемі қадағалап, тиісті жұмысты жалғастырамыз», деді Дархан Сатыбалды.
Күн тәртібіндегі екінші мәселе – облыстағы «сақалды» құрылыс нысандары құрылысына қатысты жауапты тұлғаларға Ордабасы ауданындағы мектептер мен Төлеби ауданындағы көпір салу мәселесін аяқтау және реттеу бойынша тапсырмалар берілді.
Сонымен қатар отырыста №4 «Сыбайлас жемқорлықтың алдын алу және оған қарсы іс-қимыл» үлгілік базалық бағытын іске асыру барысы қаралды.
Қазақстан Республикасы Сыбайлас жемқорлыққа қарсы іс-қимыл агенттігінің Түркістан облысы бойынша департаментінің басшысы Мұрат Төлеубаев мемлекеттік, бюджеттік және квазимемлекеттік мекемелерде сыбайлас жемқорлық тәуекелдерін жою бойынша бірлескен жұмысты одан әрі жалғастыру қажет екенін, бұл мәселе тұрақты бақылауда тұрғанын атап өтті.
Мәжіліс қорытындысы бойынша облыс әкімі Дархан Сатыбалды мен комиссия мүшелері тарапынан жауапты басшыларға, аудандар мен қалалардың әкімдеріне тиісті тапсырмалар берілді.
