Сирия терроризммен күресу үшін Түркиядан көмек сұрады
Сирияның жаңа үкіметі Түркиядан лаңкестікпен, соның ішінде «Ислам мемлекетімен» күресте қорғаныс қабілетін нығайтуға көмек сұрады. Бұл туралы 23 шілдеде Түркия қорғаныс министрлігі хабарлады.
«Сирия әкімшілігі қорғаныс қабілетін нығайту және Ислам мемлекеті басқаратын лаңкестік ұйымдармен күресу үшін Түркиядан ресми көмек сұрады. Біз Сирияның қорғаныс қабілетін нығайтуға күш салуды жалғастырамыз», — деп жазылған.
Израильдің соңғы шабуылдары друз қауымы мен Дамаск арасындағы, әсіресе оңтүстіктегі Сувейда аймағында шиеленіскен қарым-қатынастардың дамуына ықпал етті. Түркия Сирияның аумақтық тұтастығын қорғау, тұрақтылықты қамтамасыз ету және лаңкестік ұйымдармен күресуде шешуші ұстанымын сақтауда.
Израиль Сирия аумағына 14 шілдеде соққы бере бастады. Тель-Авив шабуылдарға Сирияның оңтүстігіндегі друздарды Сирия армиясынан қорғау қажеттігін алға тартты. 16 шілдеде израильдіктердің діндастарына көмектесу үшін Сириямен шекараны бұзып өтпек болғаны хабарланған.
19 шілдеде Израиль премьер-министрі Биньямин Нетаньяху мен Сирияның өтпелі президенті Ахмед аш-Шараа Вашингтонның қолдауымен атысты тоқтатуға келісті. Сондай-ақ АҚШ друз, бедуиндер және сунниттерді «жаңа, біртұтас сириялық бірегейлікті» құру үшін қаруларын тастауға шақырды.
