Қырғызстан медицина қызметкерлерін оқытуға мемлекеттік монополия енгізді
Қырғызстан президенті Садыр Жапаров медицина саласына мамандар даярлауға мемлекеттік монополия енгізу туралы жарлыққа қол қойды. Бұл туралы мемлекет басшысының сайтында хабарланды.
Жарлыққа сәйкес, Қырғыз мемлекеттік медицина академиясы жүйелік маңызды мемлекеттік жоғары оқу орны мәртебесін алды – оған жоғары медициналық және фармацевтикалық білімі бар мамандарды даярлауға, сондай-ақ медициналық және ғылыми кадрларды қайта даярлауға және олардың біліктілігін арттыруға айрықша құқық беріледі.
Жекеменшік медициналық жоғары оқу орындары 2026 жылдың 1 маусымына дейін Денсаулық сақтау министрлігінде аккредитациядан өтуі тиіс. Одан өткендер Қырғыз мемлекеттік медицина академиясы филиалдарына немесе құрылымдық бөлімшелеріне айналады.
Аккредитациядан өтпеген университеттер Қырғыз мемлекеттік медицина академиясы бақылауымен дайындық курстары немесе оқу және клиникалық базалар форматында жұмыс істей алады.
Құжатта соңғы жылдары Қырғызстанда кадрлар даярлауға лицензиясы бар жекеменшік медициналық университеттер саны күрт өскені атап өтілген. «Алайда олардың көпшілігінде қажетті клиникалық база жоқ, профессорлық-оқытушылық құрам біліктілік талаптарына сай емес, ал оқу процесі негізінен ең төменгі практикалық дайындығы бар ресми диплом беруге қысқарған. Нәтижесінде жыл сайын білімі мен практикалық дағдылары төмен жүздеген мамандар оқуын бітіріп шығады, бұл Қырғызстанның медициналық білім беру жүйесіне деген сеніміне нұқсан келтіріп, халықаралық дәрежедегі дипломға нұқсан келтіреді», — дейді мамандар.
