ТМД елдерінің онкологтары онкологиялық көмек көрсетуде күш-жігерін біріктіруде
2025 жылғы 16 қыркүйекте Мәскеуде «Өмір үшін/For life» VIII Халықаралық онкология және радиотерапия форумы аясында ТМД-ға мүше мемлекеттердің онкология саласындағы Қоғамдық кеңесінің және ТМД және Еуразия елдерінің онкология және радиология орталықтары мен институттары директорлары қауымдастығының президиумының бірлескен отырысы өтті.
Шараға Қазақстан, Беларусь, Қырғызстан, Тәжікстан, Өзбекстан, Моңғолия ұлттық онкологиялық орталықтарының және ТМД Атқару комитетінің басшылары қатысты.
Кездесуге қатысушылар бүкіл әлемде қатерлі ісік ауруларының жалпы өсуі байқалатынын және осы патологиядан болатын өлім айтарлықтай жоғары деңгейде қалып отырғанын атап өтті. Осыған орай, Достастық елдері мамандарының қатерлі ісікпен күресудегі ынтымақтастығы маңызды әрі өзекті болып табылады.
Достастық елдерінде онкология саласындағы базалық ұйым тұрғындардың онкологиялық аурулармен сырқаттануы мен өлім-жітімінің жағдайын талдау бойынша ауқымды жұмыстарды атқаруда.
Әр елдің озық тәжірибесін, практикалық өзара іс-қимыл және ғылыми ынтымақтастық қажеттілігін негізге ала отырып, Қоғамдық кеңес ТМД-ға мүше мемлекеттердің 2027–2031 жылдарға арналған қатерлі ісік ауруларына қарсы күрес саласындағы ынтымақтастығы тұжырымдамасын іске асыру жөніндегі іс-шаралар жоспарының жобасын келісті. Құжат жобасы ағымдағы жылдың қазан айында өтетін ТМД денсаулық сақтау саласындағы ынтымақтастық кеңесінің кезекті отырысында Достастық елдерінің денсаулық сақтау министрлеріне ұсынылады.
Беларусь Республикасының өкілдері отырысқа қатысушыларды ТМД және Еуразия елдері онкологтары мен радиологтарының XV съезіне дайындықтың негізгі кезеңдері туралы хабардар етті. 2026 жылы Тәуелсіз Мемлекеттер Достастығындағы Денсаулық сақтау жылы Минскіде өтетін болды.
2025 жылы Достастықтағы онкология саласындағы елеулі оқиғалардың бірі Моңғолияның ТМД және Еуразия елдерінің онкология және радиология орталықтары мен институттары директорларының қауымдастығына қосылуы болды. Кездесу барысында ТМД-ға мүше мемлекеттердің онкология саласындағы базалық ұйымы мен Моңғолияның Ұлттық онкологиялық орталығы арасында ынтымақтастық туралы меморандумға қол қойылды.
Кездесуде сондай-ақ «ADIOR next» аясында жыл сайынғы халықаралық жас ғалымдар байқауының «ТМД-ның онкология саласындағы үздік жас маманы – 2024» номинациясы бойынша жеңімпазды марапаттау рәсімі өтті.
