Өзбекстан 60 миллион АҚШ долларына қазақстандық тоң май өнімдерін сатып алады
Ташкент қаласында «Майлы дақылдарды қайта өңдеушілердің ұлттық қауымдастығы» заңды тұлғалар бірлестігі мен өзбекстандық «Fayz Oil Imports» ЖШҚ компаниясы өзара ынтымақтастық туралы меморандумға қол қойды.
Келісім аясында «Fayz Oil Imports» компаниясы жыл бойы 60 миллион АҚШ долларына Қауымдастық құрамына кіретін қазақстандық өңдеу кәсіпорындарының май-тоң май өнімдерін сатып алуды жоспарлап отыр.
Өзбекстан – қазақстандық май-тоң май өнімдерінің ірі бес импорттаушысының бірі.
2024-2025 жылғы мерзімде Қазақстаннан Өзбекстанға өсімдік майлары мен жоғары ақуызды мал азығы (шрот пен күнжара) 349 миллион АҚШ долларына экспортталды. Бұл алдыңғы маусыммен салыстырғанда 82%-ға көп.
Қазақстан өткен жылы Орталық Азия елдеріне өсімдік майлары мен майлы дақылдарды қайта өңдеу өнімдерін экспорттау бойынша көшбасшы орнын нығайтып, Өзбекстан мен Тәжікстанның негізгі жеткізушісіне айналды.
Өзбекстан нарығындағы қазақстандық майдың үлесі 65%-ға (2017 жылы – 13%) жетті, ал Тәжікстанда 74 пайыз (2017 жылы – 15%).
Сонымен қатар, Қазақстан өңір елдерін толықтай құс және мал азығын өндіруде маңызды құрамдас бөлік саналатын күнбағыс шроты мен күнжарасымен қамтамасыз етіп отыр.
«Біздің май-тоң май өнімдеріміз әлемдік нарықта жоғары сұранысқа және айтарлықтай экспорттық әлеуетке ие. Біз өнімді 20-дан астам елге жеткіземіз. Қазақстаннан экспортталатын күнбағыс майының көлемі қазірдің өзінде Орталық Азия елдерінің жиынтық импортынан 1,5 есеге көп, қажет болған жағдайда біз бұл нарықты толық қамтамасыз ете аламыз», — деп атап өтті Майлы дақылдарды қайта өңдеушілердің ұлттық қауымдастығы.
Май-тоң май өнеркәсібі Қазақстандағы ең қарқынды дамып келе жатқан салалардың бірі болып табылады және соңғы жылдары әртүрлі агроөнеркәсіптік нарық қатысушыларының назарын өзіне аударуда. Майлы дақылдар өндірісін ұлғайту және Қазақстанның қолда бар өңдеу қуатын кеңейту – Қазақстан Республикасы Президентінің алға қойған мақсаттары.
Майлы дақылдарды қайта өңдеушілер ұлттық қауымдастығы — коммерциялық емес ұйым, оның мақсаты Қазақстандағы өңдеуші кәсіпорындарды біріктіру және май-тоң май өнеркәсібін дамыту болып табылады. Ол 2021 жылы 20 мамырда құрылған. Майлы дақылдарды қайта өңдеушілер ұлттық қауымдастығы Қазақстан Республикасындағы май зауыттарының 70%-дан астамын құрайды. Майлы дақылдарды қайта өңдеушілер ұлттық қауымдастығы май және тоң май өндірушілер, салалық қауымдастықтар, ғылыми мекемелер өкілдері және мемлекеттік органдар арасындағы байланысты дамытады және жақсартады. Май және тоң май өнеркәсібін болжау және талдау Майлы дақылдарды қайта өңдеушілер ұлттық қауымдастығы жұмысының ажырамас бөлігі болып табылады.
