Қырғызстан Еуроодақты тәуелсіз санкциялық аудит жүргізуге шақырды
Қырғызстан Сыртқы істер министрлігі Еуропалық Одақтан тәуелсіз аудит жүргізуге және қырғыз банктеріне салған санкцияларының негізділігін растауға шақырды.
«Қырғызстан Республикасы Еуропалық Одақты нақты жағдайларды тексеру және қарастырылып жатқан кез келген шектеу шараларының сенімді және тексерілген деректерге негізделгенін растау үшін тәуелсіз, халықаралық деңгейде танылған аудит жүргізуге ресми түрде шақырады», — делінген Сыртқы істер министрлігінің мәлімдемесінде.
Министрлік сондай-ақ «тұрақты деректер алмасуды, транзакцияларды бақылауды және бірлескен тәуекелдерді бағалауды» жүргізетін Қырғызстан-Еуроодақ бірлескен техникалық жұмыс тобын құруды ұсынды.
Сыртқы істер министрлігі Қырғызстан заңды тұлғаларының Еуроодақ санкциялар тізіміне енгізілуіне өкініш білдіріп, елдің «халықаралық міндеттемелерін қатаң сақтайтынын» және санкцияларды айналып өту тәуекелдерінің алдын алу үшін Еуроодақ серіктестерімен «ашық және сындарлы диалог» жүргізетінін атап өтті.
«Еуропалық Одақ Орталық Азия мемлекеттерімен стратегиялық серіктестік орнатуға және басқа да мәселелермен қатар, еліміздің әлеуметтік-экономикалық дамуына ықпал етуге ниетті екенін үнемі мәлімдейді. Осыған байланысты Қырғызстан тарапы Еуропалық Одақпен және оның мүше мемлекеттерімен тең, өзара құрметке негізделген сенімді серіктестікке дайын. Бұл тәсіл бізге біржақты санкцияларға қарағанда өзара тиімді мақсаттарға қол жеткізуге мүмкіндік береді», — делінген мәлімдемеде.
Алдыңғы күні Ресейге қарсы 19-шы санкциялар пакетінің аясында Еуропалық Одақ Қазақстан, Қырғызстан және Тәжікстандағы бірнеше банктермен операцияларға шектеулер енгізді. Атап айтқанда, санкциялар Ресейдің ВТБ Банкінің Қазақстандағы филиалына, қырғызстандық «Толубай» және «Еуразиялық жинақ банкіне», сондай-ақ тәжікстандық «Душанбе Ситибанк», «Спитамен» және «Коммерцбанк» банктеріне бағытталған болатын.
