МАЛ АУРУЫНА ҚАРСЫ ПРОФИЛАКТИКАЛЫҚ ШАРА ҚОЛҒА АЛЫНУДА
Мемлекеттің әлеуметтік-экономикалық дамуында ауыл шаруашылығы саласының алатын орны да ерекше. Бұл сала елдің азық-түлік қауіпсіздігін қамтамасыз етумен қатар, сапалы өнімдері арқылы халықтың денсаулығын сақтауға да ықпал етеді. Сол себепті, мал шаруашылығында төрт түлік малдың санын арттыруға қоса олардың аурудан аман болуын, өлім-жітімге ұшырамауын да қамтамасыз ету маңызды. Мемлекеттің ветеринария саласының басты міндеттерінің бірі де елдегі төрт түлік малдың күтпеген аурулардан жаппай қырылып қалуына, немесе малдың әлдебір ауруынан адамдардың денсаулығына зиян келмеуіне жағдай жасау.
Түркістан облысында мал шаруашылығын ғылым мен білім жетістіктерін, озық технологияларды пайдалана отырып өсіру, саны мен қатар сапасын да жақсарту үшін мал дәрігерлік саланың қызметкерлері жыл бойын жоспарға сай аурулардың алдын алу, эпидемияға жол бермеу бағытында тиесілі жұмыстарды атқарып келеді.
Мақтааралда энзоотиялық ауруларға қарсы күрес жұмыстары қарқынды жүргізілуде. Ауданға қарасты кенттер мен ауылдық округтерде мал ұстайтын тұрғындардың қора-қопсылары мен жапсарлас аймақтарына кенеге қарсы бүрку, залалсыздандыру шаралары қолға алынған.
Бүгінде ауданның ветеринар мамандары төрт түлікте жиі кездесетін құтыру, аусыл, лептомпироз, пастереллез, сібір жарасы, эхинококкоз, оспан, эмкар, брадзот, эктима, туберклез сынды ауруларға қарсы профилактикалық шараларды ұйымдастырып, мал ұрлығының алдын алу мақсатында бірдейлендіру жұмыстары да қарастырылып жатыр.
Биыл күз айында энзоотиялық іс-шараларды орындауға 8 нива автокөлігі мен 11 бекет меңгерушісі, 15 мал дәрігері мен 22 ветеринар-фельдшер мамандары жұмылдырылып, қора жайлармен жапсарлас 132 789 шаршы метр, 870 533 шаршы метр мал иірімдері мен суаттар, бұтарлар залалсыздандырылған. Сонымен қатар басқарма тарапынан берілген 19 дана ранс және 2 дана ірі қара малды бүркуге арналған апараттардың көмегімен жоспардағы 54 091 бас ірі қара, түйе және жылқы малдарының 13 036-на, 67 219 бас ұсақ малдың 12 141-не бүрку жұмыстары жүргізілген.
Эпизоотолог маманның айтуынша, кенеге қарсы улау жұмыстарының тиімділігі мал қораларының механикалық жағдайына да байланысты. Сондықтан залалсыздандыру жұмыстарының алдында қора-жайларды қилар мен қоқыстардан тазалаған дұрыс.
-Тазалық науқаны ұтымды ұйымдастырылса, кене саны азайып, одан жапа шегетіндер де азаяды. Қырым-қанды қызбасы аса қауіпті аурудың қатарына жататындықтан, мамандар мейлінше сақ болуға шақырады. Ал, малы бар шаруалар төрт түлігін дер кезінде залалсыздандыруға жағдай жасаулары тиіс, — дейді «Ветеринариялық қызметі» ШЖҚ МКК Мақтаарал аудандық филиалының маманы Нұрқанат Қуанов.
Айта кетейік, өткен жылдың тиісті мерзімінде кене шағудың 100 фактісі тіркелсе, ағымдағы жылы 115-ке жетіп отыр. Оның себебі, биылғы көктемнің жауын-шашынды, ал, жаздың аптап ыстық болуымен байланысты дейді мамандар. Жалпы 20 факті ішкі қора-жайларда орын алса, 85 факті егістіктер мен мал жайылымдық жерлерде орын алған.
Сондай-ақ, таяуда Түркістан облысының Ветеринария басқармасының басшысы Ғани Құрманбайұлы Сайрам ауданына арнайы іссапармен келді. Сапар аясында 2024 жылы бекітілген «Үш жақты» келісімшартқа сәйкес Қарабұлақ ауылдық округіндегі мал өлекселерін тастайтын «Беккари» шұңқырын салу бойынша және Қарасу ауылдық округі Қарасу ауылы 057 орамдағы «Қаңғыбас иттер мен мысықтарды уақытша ұстайтын орында» жүргізіліп жатқан жұмыстар барысын саралады.
Сонымен қатар, облыстың бас ветеринары ауыл шаруашылығы жануарлары тұратын қора жай мен оған жапсарлас аймақтарды күзгі кезеңдегі энзоотиялық ауруларға (кенеге) қарсы залалсыздандыру жайлы атқарылып жатқан жұмыстарды бақылады.
