МЕКТЕП ОҚУШЫЛАРЫ АВТОБУСТА ЖЕҢІЛДІКПЕН ЖҮРЕДІ

Мемлекет басшысы бұған дейінгі жолдауларында ана мен баланы қорғау, отбасының әлеуметтік-тұрмыстық жағдайын жақсарту бойынша нақты тапсырмалар беріп келген. Ал, күні кешегі қазақстандықтарға арнаған жаңа жолдауында балалардың қауіпсіздігі мен оларды қолдау мен қамқорлық жасау жөнінде міндет қойды. Сондықтан да Түркістан облысында ана мен баланы қорғау мен қолдау, балалардың қауіпсіздігінқамтамасыз ету бойынша көптеген нақты істер атқарылуда. Түркістан қаласының қоғамдық көліктеріне заманауи талаптарға сай барлық жағдайлар жасалған. Атап айтқанда автобустарда төлем жасаудың онлайн әдісін жүзеге асыратын «AlemPay» электронды төлем жүйесі қолданысқа енгізілген.
Енді шаһарда «AlemPay» төлем картасын сатып алу арқылы мектеп оқушылары жол ақысының 50%-ын ғана төлейтін болады. Яғни 7 жастан 18 жасқа дейінгі мектеп оқушылары карта арқылы автобус жол ақысының жартысын ғана төлеу мүмкіндігіне ие болады.
«AlemРay» төлем карталарын Түркістан қаласындағы «Қуаныш» базары аялдамасынан және «Қуаныш» базары кеңсе тауарлары павильонындағы (№52) сауда нүктелерінен алуға болады.
Картаны банк қосымшалары немесе Киви терминалы арқылы толтыра аласыз. Ал дайын картаны 2505 нөміріне тіркеп, жол ақысын төлеуге болады.
Қолма-қол 100 теңге төлегенше, «AlemРay»-мен 70 теңге төлеңіз! Ал мектеп оқушылар үшін жол ақысы – 35 теңге!
Сонымен қатар, қазіргі таңда шаһардағы жекелеген санаттағы азаматтардың қоғамдық көлікте тегін жүру мәселесі бойынша жаңа жоба әзірленіп, тиісті мекемелерге жолданды. Егер қолдау тапқан жағдайда жүзеге асырылатын болады.
Түркістан қаласында 22 бағытта қатынайтын 190-ға жуық қоғамдық көліктер тұрақты түрде қызмет көрсетуде.