ИНВЕСТОРЛАРМЕН БІРҚАТАР ЖАҢА ЖОБАЛАР ТАЛҚЫЛАНДЫ
Мемлекет басшысы ел экономикасының барлық салалар бойынша қарқынды дамуын қамтамасыз ету үшін инвнстициялық жобаларды жүзеге асыру керектігін айтқан. Ол үшін әр аймақтың басшылығы жақын және алыс шетелдермен сауда-экономикалық, өңіраралық, мәдени-гуманитарлық байланыстарды нығайта отырып, әрбір инвестормен жеке-жеке жұмыс жүргізіп, инвестициялық жобалалрды жүзеге асыруға барлық жағдайларды жасап қою қажеттігін айтқан. Түркістан облысында халық шаруашылығының негізгі салаларының барлығында да инвестициялық жобалар жүзеге асырылып, инвестиция тарту арқылы даму жолға қойылған. Келетін инвесторларға жобаларын іске асыру үшін арнайы экономикалық және индустриялық аймақтардан жер телімдерін беру, сапалы инфрақұрылымдармен қамтамасыз ету жағы да қарастырылған.
Облыс әкімінің өзі биылғы жылдың өзінде бірнеше ірі инвестициялық жобаларды тарту бағытындағы жұмыстарды ұйымдастырып, шетелдерге барғанда, инвесторлар келгенде оларға аймақтың инвестициялық тартымдылығын көрсетіп, түсіндіріп, меморандумдарға қол қойып, солардың негізінде инвестициялар тартуға жол ашуда.
Түркістан облысының әкімі Дархан Сатыбалды ауғанстандық инвесторлармен кездесіп, бірқатар жаңа жобаларды талқылады. Алдағы уақытта қос тарап сауда-экономикалық және мәдени байланыстарды күшейтуге уағдаласты.
Облыс әкімі өңірдің кешенді даму жоспарында инвесторлар тарту, оларға қолайлы жағдай жасау мәселесіне айрықша тоқталып, инвесторлармен байланыс орнатуға дайын екенін жеткізді. Тараптар өңіраралық байланыстырды дамыту, сауда-экономикалық және гуманитарлық ынтымақтастықты кеңейту бағытындағы бірқатар жобаларды талқылады. Атап айтқанда, азық-түлік өнімдерін өңдеу, мәдениет пен туризмді дамыту бағытындағы бірқатар ұсыныстармен бөлісті.
– Өңіраралық байланыстырды дамыту біз үшін өте маңызды. Әр инвестормен жеке-жеке жұмыс істейміз. Мен өзім барлық инвесторлармен тікелей байланыстамын. Сіздермен де тұрақты түрде байланыс орнатып, жемісті жобаларды жүзеге асыратынымызға сенімдімін, — деді облыс әкімі.
Облыс әкімі инвесторларды Түркістан облысында көкөністерді өндіру мен өңдеуді кеңейту жөніндегі жобаларды жүзеге асыруға шақырды. Дархан Сатыбалды жергілікті билік жобаны қолдауға дайын екендігін айтып, нысанды анықтау бойынша бірлесіп шаралар жүргізуге қатысты жауапты тұлғаларға нақты міндеттер жүктеді.
Шетел инвесторларының кептірілген жемістер өңдейтін жеке зауыттары бар. Компания кептірілген жемістерді, соның ішінде кондитерлік мейіз бен құрманы импорттаумен, сондай-ақ зығыр, бидай, ұн және күнбағыс майы сияқты ауылшаруашылық өнімдерін экспорттаумен айналысады. Қазақстандағы және Ресейдегі ірі зауыттарды кондитерлік мейізбен қамтамасыз етеді және Ауғанстандағы компания арқылы тауарларды жақын және алыс шетелдерге экспорттайды.
