3 МЕКТЕП, 3 КӨПҚАБАТТЫ ТҰРҒЫН ҮЙДІҢ ҚҰРЫЛЫСЫ ЖҮРГІЗІЛУДЕ
Әлеуметтік мемлекет ретінде Қазақстан Республикасында азаматтардың әлеуметтік мәселелерін шешіп, әлеуметтік-тұрмыстық жағдайын жақсартуға ерекше назар аударылып отырады. Түркістан облысында да мемлекеттік саясат аясында тұрғындардың әлеуметтік-экономикалық жағдайын жақсарту, әлеуметтік нысандар, оның ішінде тұрғын үйлер құрылысын, білім мекемелері мен денсаулық мекемелерін, тағы басқаларын салу жоспарлы түрде іске асырылуда.
Төлеби ауданында «Жайлы мектеп» жобасы аясында 3 мектептің құрылысы жүргізілуде. Бұған қоса, 3 көпқабатты тұрғын үйдің құрылысы қарқынды жүзеге асуда. Атап айтсақ, Алатау ауылдық округі, Қосағаш елді мекенінде 300 орындық, Көксәйек ауылдық округі Көксәйек елді мекенінде 600 орындық, Киелітас ауылдық округі Достық елді мекенінде 900 орындық мектеп ғимараттары салынуда.
Бүгінде үш «Жайлы мектептің» сыртқы инженерлік-коммуникация жүйелерінің құрылысы қарқынды жүргізілуде. Төлеби ауданы әкімінің орынбасары Лесбек Серікбаев үш білім ошағын аралап, мердігер мекеме өкілдеріне жолығып, атқарылып жатқан жұмыс барысын қадағалады.
Қосағаш елді мекеніндегі 300 орындық мектептің сыртқы инженерлік-коммуникация жүйелерінің құрылысын «Содбис Строй» ЖШС жүргізіп жатыр. Қазіргі кезде білім беру мекемесіне электр жүйесін, ауыз су құбырын, газ құбырын, сымтетік желісін тарту жұмыстары аяқталуға жақын.
Сондай-ақ Достық елді мекеніндегі 900 орындық мектептің сыртқы инженерлік-коммуникация жүйелерінің құрылысы тартылып, жол салу жұмыстары жүргізіліп жатыр. Мердігер мекеме: «Construction Group SAMRUK» ЖШС. Көксәйек елді мекеніндегі 600 орындық мектептің сыртқы инженерлік-коммуникация жүйелерінің құрылысы да қарқынды жүзеге асуда.
Аудан әкімінің орынбасары Ленгір қаласы, І мөлтек ауданы, Қапал батыр көшесі бойындағы 5 қабатты көппәтерлі 3 тұрғын үйдің құрылыс жұмыстарына назар аударды.
Аудандағы құрылыс алаңдарында қарбалас тірлік. Мердігер мекеме басшыларына құрылыс жұмыстарын кестеде көрсетілген мерзімде аяқтауды тапсырған аудан әкімінің орынбасары халық көптен күткен баспаналарына қол жеткізіп, оқушылар жаңа білім ошағында білім алу қажеттігін ескертті.
