АҚШ-тағы Hyundai зауытында жүздеген оңтүстік кореялықтар ұсталды

Өткен аптада АҚШ-тың Иммиграция және Кеден қызметі Hyundai Motor Group және LG Energy Solution компанияларының Джорджиядағы электромобильдерге аккумулятор шығаратын зауытында рейд жүргізді. Рейд барысында 457 адам қамауға алынды, оның 316-сы Оңтүстік Корея азаматтары.

Рейдке дайындық бірнеше айға созылған. Бұл АҚШ иммиграция және кедендік бақылау тарихындағы заңсыз иммиграцияға қарсы ең үлкен операция. Америкалық тараптың айтуынша, ұсталғандар шекараны заңсыз кесіп өту немесе визаның мерзімі өтіп кеткендіктен АҚШ-та жұмыс істеуге құқығы болмаған.

Ұсталған Оңтүстік Корея азаматтарының көпшілігі АҚШ-қа ESTA визасы бойынша қысқа мерзімге немесе B1 іскерлік визасымен келген. Бұл схеманы оңтүстіккореялық компаниялар H-1B визасын – білікті шетелдік жұмысшыларға арналған иммиграциялық емес визаны алудағы қиындықтарға байланысты бұрыннан пайдаланып келеді, деп жазады агенттік.
Кейбір жұмысшыларды зауыттан қолдарын кісендеп, шынжырмен алып кетті, деп хабарлайды BBC News. Бір жұмысшының айтуынша, ұсталғандардың дені учаскеде өндірістік желілерді орнатып жатқан механиктер.

Hyundai Motor «ұсталғандардың ешқайсысы компанияда тікелей жұмыс істемейтінін» айтты, бірақ олардың зауытта қандай рөл атқаратынын нақтыламады.

9 қыркүйекте Оңтүстік Кореяның Сыртқы істер министрі Чо Хён АҚШ-қа келіп, Мемлекеттік хатшы Марко Рубиомен кездесті. Келіссөздерден кейін Сеул мен Вашингтон жұмысшыларды босатуға және оларды депортация емес, өз еркімен үйлеріне жіберуге келісті. Сондай-ақ Чо Хён екі жақ оңтүстіккореялық компанияларға виза беру шарттарын жақсарту үшін жұмыс тобын құруға келісті.

Ұсталғандар 10 қыркүйекте кетуі керек еді, бірақ президент Дональд Трамп жұмысшыларға АҚШ-та қалуға рұқсат берді, бірақ, АҚШ-та отбасы бар бір ғана жұмысшы ұсынысты қабылдады. Көпшілігі Құрама Штаттарға оралмауды шешті.

11 қыркүйекте Сеулдегі Инчхон халықаралық әуежайына 316 оңтүстік кореялық пен 14 шетелдік мінген Korean Air чартерлік рейсі қонды.

Оңтүстік Кореяның Еңбек министрі Ким Ён Хун тұтқындарға жасалған қарым-қатынасты айыптап, оны қарулы офицерлер бұғаулап жатқан жұмысшыларды көргенде «таң қалдырғанын» айтты.

Вашингтонның заңсыз жұмысшыларды қудалау құқығын мойындай отырып, Ким корей жұмысшылары «американдық жұмыс орындарын тартып алып жатқан жоқ, болашақта американдықтарды жұмысқа алатын зауыт салып жатыр» деді.

Hyundai зауытына жасалған рейд Оңтүстік Корея президенті Ли Чжэ Мённың Америкаға сапарынан екі апта өткен соң жасалды. Сапар алдында Вашингтон Сеулдің АҚШ экономикасына 350 миллиард доллар инвестициялауға және американдық энергияны 100 миллиард долларға сатып алуға дайын болуына байланысты Корея экспортына салынатын баж салығын 25 пайыздан 15 пайызға дейін төмендетуге келісті.

Ли Чжэ Мён корей жұмысшыларының ұсталуына түсініктеме бере отырып, егер АҚШ үкіметі Корея Республикасынан келетін жұмысшыларға виза жүйесін өзгертпесе, бұл оқиға оңтүстік кореялық компаниялардың АҚШ-тағы инвестициясына кері әсер етуі мүмкін екенін айтты.

«Бұл ұзақ мерзімді жұмысшылар емес. Зауыт салғанда немесе зауытқа жабдық орнатқанда мамандар қажет, бірақ АҚШ-та ондай жұмыс күші жоқ және олар біздің қызметкерлерге тұруға және жұмыс істеуге виза бермейді», — деді ол. «Бұл АҚШ-тағы тікелей инвестицияға әсер етуі мүмкін», — деді Оңтүстік Корея президенті.

Hyundai компаниясы иммиграциялық рейдтен кейін Джорджиядағы зауыт құрылысы  бірнеше айға кейінге қалдырылғанын хабарлады.

Зауытқа жасалған рейдтің келесі күні АҚШ президенті «АҚШ иммиграция және кеден қызметі өз жұмысын істеп жатыр» және корей жұмысшылары заңсыз иммигранттар екенін айтты. Бір-екі күннен кейін ол әлеуметтік желіде былай деп жазды: «Біз сіздің инвестицияңызды құптаймыз және сіздің өте ақылды жұмысшыларыңыздан әлемдік деңгейдегі өнімдерді шығаруға заңды түрде кіруін күтеміз және біз бұл үшін тез арада заңды мүмкіндіктер жасаймыз. Өз кезегінде американдық жұмысшыларды жалдап, оқытуыңызды сұраймыз».

Жексенбі күні АҚШ Мемлекеттік хатшысының орынбасары Кристофер Ландау Сеулге барды. Корея Республикасы Сыртқы істер министрінің бірінші вице-министрі Пак Юн Джумен кездесуде Ландау АҚШ корей жұмысшыларының жаппай қамауға алынғанына өкініш білдіретінін және алдағы уақытта мұндай оқиғалардың алдын алуға күш салатынын айтты.

Ландау отанына оралған оңтүстіккореялық азаматтардың АҚШ-қа қайта кіру кезінде ешқандай қиындыққа тап болмайтынын атап өтті. Сонымен қатар, ол виза мәселелері бойынша жұмыс келіссөздерін жүргізуді ұсынып, Америка экономикасына үлес қосып жатқан оңтүстіккореялық корпорациялардың инвестициясын заңнамалық қолдау қажеттігін атап өтті.