Өзбекстанда қалааралық бағыттарда демалыссыз жұмыс істеген жүргізушілерге айыппұл салынады
Өзбекстан Олий Мажлисінің сенаты халықаралық және қалааралық тасымал кезінде жүргізушілердің еңбек және демалыс режимін бұзғаны, сондай-ақ теміржол көлігі мен метрополитендегі қауіпсіздік талаптарын сақтамағаны үшін жауапкершілікті көздейтін заңды мақұлдады.
Құжатпен Әкімшілік жауапкершілік кодексіне, сондай-ақ «Тасымалдаушының азаматтық-құқықтық жауапкершілігін міндетті сақтандыру туралы», «Лицензиялау, рұқсат беру және хабарлау рәсімдері туралы» және «Көлік туралы» заңдарға өзгерістер мен толықтырулар енгізілген.
Заң қабылданғанға дейін көліктік бақылау инспекциясы заңбұзушылықтарды анықтаған кезде заңды тұлғаларға ұйғарым шығаруға ғана құқылы болатын. Қазір тасымалдау көлемінің өсуіне байланысты стандарттар күшейтілуде.
Мәселен, 2023-2024 жылдардағы деректер бойынша метрополитенмен тасымалданған жолаушылар саны 172 миллионнан 270 миллион адамға, жолаушылар пойыздарымен – 9,3 миллионнан 10,07 миллионға дейін өсті, автомобиль көлігімен 8 миллиардтан астам адам тасымалданды. Осы кезеңде теміржол көлігімен 102,7 миллион тонна, автомобиль көлігімен 2 миллиард тоннадан астам жүк тасымалданған.
Көрсеткіштердің өсуіне қарамастан, 2024 жылы теміржол көлігінде және метрополитенде қауіпсіздік ережелерін өрескел бұзудың 130 фактісі тіркеліп, 4 миллиард сумға жуық материалдық шығын келтірілді. Сондай-ақ, реттелмейтін өткелдерде пойыздар мен вагондардың қатысуымен 38 жол-көлік оқиғасы тіркеліп, 11 адам қаза тапты.
Осыған байланысты жолаушыларды, багажды және жолжүкті тасымалдау ережелерін, сондай-ақ теміржол көлігінде және метрополитенде қауіпсіздік талаптарын бұзғаны үшін лауазымды тұлғалар мен қызметкерлерге әкімшілік жауапкершілік енгізілуде. Мұндай жағдайларда айыппұл 4,12 миллион сум болады.
Заңға сәйкес, 400 шақырымнан астам қашықтыққа жолаушылар мен жүктерді тасымалдау кезінде немесе жүргізушінің жұмыс ауысымынан 9 сағаттан артық уақыт өткенде, көліктік бақылау инспекциясы жүргізушілердің еңбек және демалыс режимін сақтауын қадағалайтын болады.
Қолданыстағы заңнамада қалааралық және халықаралық жолаушылар тасымалын жүзеге асыратын автобустарды өшірілген тахографпен (жұмыс уақытын, демалыс уақытын, жылдамдық пен қашықтықты тіркейтін бақылау құрылғысы) басқарғаны үшін жауапкершілік көзделген. Алайда тахограф деректері бойынша еңбек және демалыс режимін бұзғаны үшін жауапкершілік белгіленбеген.
Өзгерістерге сәйкес, белгіленген еңбек және демалыс режимін бұзған жүргізушілерге жеті негізгі есептік бірлік (2,884 миллион сум) көлемінде айыппұл салынады.
2024 жылы Өзбекстанда 9364 жол-көлік оқиғасы тіркелсе, оның 3045-і (32,5%) жүк және жолаушылар тасымалдайтын көліктердің қатысуымен болған. Жазатайым оқиғалардың жартысына жуығы – 1592-сі Damas-қа қатысты. 351 жол-көлік оқиғасында жүргізушілер рөлде ұйықтап қалып, нәтижесінде 189 адам қаза тауып, 285 адам жарақат алған.
