ЖҮКТІ ӘЙЕЛГЕ АРНАЛҒАН БІРЕГЕЙ ЖОБА

Мемлекетіміз ана мен балаға қамқорлықты күшейтіп, олардың қауіпсіздігін қамтамасыз етуге аса мән беруде. Оған қоса аналардың жүктілігін назарда ұстап, ана мен өмірге келген сәбиінің денсаулықтарының жақсы болуына ықпал етуді де қолға алуда. Аналардың жүктілігі басталғаннан босанғанға дейінгі денсаулық жағдайы мен шарананың жетілуін қадағалау да жолға қойылып келеді. Бұл бағытта көптеген арнаулы да жоспарлы шаралар белгіленіп жүзеге асырылуда.
Ана мен балаға қатысты сондай шараның бірі таяуда қолға алынып, жүзеге асырыла бастады.Түркістан облысында “Бір күндік клиника” – атты бірегей жобасы іске қосылып, салтанатты түрде ашылу рәсімі өтті. Облыстық N2 перинаталдық орталық базасында ашылған клиникада жүкті әйелдер ерте кезеңде диагностикалық тексеруден өтіп, туа біткен ақауларды дер кезінде анықтауға мүмкіндік береді.
№2 Облыстық перинаталдық орталығының базасында «Бір күндік клиника» пилоттық жобасы ресми түрде іске қосылды, онда жүкті әйелдер бір күнде «бір терезе» қағидаты бойынша перинаталдық диагностиканың барлық түрлерінен өтіп, зерттеулердің жылдам әрі дәл нәтижелерін ала алады. Денсаулығындағы анықталған ақауларды дер кезінде емдеу арқылы жүкті ана мен баланың денсаулықтары қалпына келтіріледі.
Бірінші және маңызды қадам — дәрігерге уақытылы бару және жүкті әйелді жүктіліктің 10 аптасынан кешіктірмей есепке алу, бұл болашақта уақытылы зерттеп-қарауды қамтамасыз етеді.
Перинаталдық диагностиканың екінші қадамы жүкті әйелді бақылауды жүзеге асыратын дәрігерден жолдама алу және №2 Облыстық перинаталдық орталықтың Ұрықты сақтау орталығына бару болып табылады. Мұнда бір күнде сараптамалық кластағы аппараттарда ұрықтың скринингтік ультрадыбыстық зерттеуі жүргізіледі, содан кейін хромосомалық ауытқуларға тексеру үшін қан алу жүзеге асырылады.
Пациенттің өмір тарихы, ұрықтың ультрадыбыстық зерттеуі және биохимиялық скрининг деректерін салыстыру тұқым қуалайтын патологиясы бар баланың туу қаупін бағалаумен нәтиже беретін арнайы заманауи компьютерлік бағдарламамен жүзеге асырылады. Қауіп жоғары болған жағдайда, жүкті әйел сол күні генетиктен консультация ала алады.
Кешендегі жаңа тәсіл ықтимал патологияларды ерте кезеңде анықтауға және бір күннің ішінде ұрықтың өмірі мен денсаулығы үшін ең дәл болжамды алуға мүмкіндік береді.
Барлық зерттеп-қарау «Бір күндік клиника» жобасының шеңберінде мүлдем тегін жүзеге асырылады.