ТҰРҒЫНДАР ТІЛЕГІН ОРЫНДАУ БОЙЫНША ЖҮЙЕЛІ ЖҰМЫС ЖҮРГІЗІЛУДЕ
Мемлекет басшысының тапсырмасымен қолға алынған «Халық үніне құлақ асатын мемлекет» тұжырымдамасын орындау мақсатында Жетісай ауданының әкімі Серік Үсенұлы бекітілген кестеге сәйкес кезекті кездесуін Ж.Ералиев ауылдық округінде жергілікті тұрғындармен өткізді. Мақсат – өткен тоқсанда округ тұрғындары тарапынан көтерілген өзекті мәселелер бойынша атқарылып жатқан жұмыстардың барысымен таныстырып, басқа да өзекті мәселелердің шешілу жолдарын бірігіп талқылау, азаматтардың өмір сүру сапасын жақсарту ісінде қосымша ұсыныс-пікірлерді тыңдау.
Басқосуға аудандық мәслихат төрағасы Медет Қасымов пен Жетісай ауданы бойынша мемлекеттік кірістер басқармасының басшысы Серік Жасұзақов, дербес бөлім басшылары мен құқық қорғау органдарының өкілдері, білім және денсаулық сақтау мекемелерінің басшылары, қоғамдық ұйымдар мен жергілікті тұрғындар қатысты.
Кездесуді аудан басшысы бірінші жарты жылдықта жұртшылық тарапынан көтерілген мәселелердің орындалуы барысымен таныстырудан бастады.
Өткен жарты жылдықта округ тұрғырдары тарапынан көтерілген 15 мәселенің 7-і нақты шешімін тапса, 3-і орындалу үстінде, ал, 5-не түсіндірме жұмыстары жүргізілген. Нақтырақ айтар болсақ, С.Сейфуллин ауылындағы ауыз жүйелерінің құрылыс-монтаж жұмыстары «ЭксклюзивСтрой» ЖШС тарапынан өндірістік кестеге сай жүргізіліп, ағымдағы жылдың соңына дейін пайдалануға тапсыру жоспарлануда. Ал, Абай елді мекенінен балабақша салуға бөлінген жер телімі округ әкімінің меншігіне қайтарылып, спорт алаңшасын салуға 18,5 млн теңге қаржы бөлінген. Мемлекеттік сатып алу жұмыстары жүргізілуде.
Сондай-ақ, «Арай» ауылдық мәдениет үйіне күрделі жөндеу жұмыстарын жүргізу үшін сәулет жоспарлау тапсырмасы (АПЗ) жасалып, жобалық-сметалық құжаттамасын дайындау жұмыстары қолға алынған, табиғи газға қосылып, қажетті компьютермен қамтылған.
КХ-75 Асықата-Мақталы автомобиль жолына жарықтандыру жұмыстарын жүргізу мақсатында жобалық-сметалық құжаттамалары жасақталып, қаралған тиісті қаржыға мемлекеттік сатып алу жұмыстары, Бәйтерек елді мекеніндегі дәрігерлік амбулаторияның құрылысына бөлінген 350 млн теңгеге тиісті жұмыстар жүргізілуде.
Округ аумағынан өтетін КХJS-4-Жамбыл-Жазықсай-Әлімбетов аудандық маңызы бар автомобиль жолында орын алған ақаулар қайта қалпына келтіріліп, Көктөбе ауылындағы (1050м) Жауқазын көшесін орта жөндеуден өткізу үшін жеңімпаз анықталып жөндеу жұмыстарын бастау жопарлануда.
Сонымен қатар, К-30-ІІІ-2 каналдың елді мекен ішінен өткен бөлігін бетондау, ішкі көшелерін орта жөндеуден өткізу, электр желілерін жаңарту, КТП орнату, ауыз суға мембрана қою, Арай ауылы тұсына бағдаршам орнату бойынша да тиісті жұмыстар жүргізілсе, жердің мелиоративтік жағдайын жақсарту мақсатында 39 тік дренжадарды қалпына келтіру үшін құрылыс жұмыстары басталған. Одан бөлек, Бәйтерек елді мекенінен дәрігерлік амбулатория, Көктөбе елді мекенінен фельдшерлік-акушерлік пункт құрылысы жүргізілуде.
Ішкі жолдардың сапасын жақсарту мақсатында жергілікті бюджеттен бөлінген 174,8 млн теңгеге жалпы ұзындығы 4,3 шақырымды құрайтын Көктебе елді мекенінің Жауқазын, Бәйтерек елді мекенінің Жүзтерек, Үтіртөбе елді мекенінің Көктем, Ғ.Мұратбаев елді мекенінің Бірлік, Жетіқазына елді мекенінің Қосарық көшелері орта жөндеуден, ал, Әуезов елді мекенінің Табыс, Абай елді мекенінің Үркер көшелері ағымдағы жөндеуден өткен.
Жаңадәуір елді мекеніндегі жаңадан түскен көшеге электр бағаналары мен түнгі жарықтар орнату үшін жергілікті бюджеттен 5 млн теңге, спорт алаңшасын салу үшін 20 млн теңге бөлінсе, Абай, Сейфуллин, Жетіқазына, Бәйтерек елді мекендеріне биылғы жылы табиғи газ жүргізудің құрылысы басталатын болады.
Кездесу барысында тұрғындар тарапынан қойылған ағын су, ауыз су, санитарлық тазалық пен жарықтандыру секілді кезек күттірмейтін мәселелер бойынша қойылған сұрақтарға заң аясында жауап берген аудан әкімінің жұмыстарын оң бағалаған тұрғындар сәттілік тіледі.
Кездесу соңында азаматтарға жеке қабылдау өткізіліп, айтылған мәселелер хаттамаға енгізілді. Әрбір мәселе бойынша жауапты мамандарға тапсырмалар берілді.
