ИНВЕСТОРЛАР ҚОЛДАУ БОЛСА ОБЛЫСҚА ҚАРЖЫ ҚҰЮҒА ДАЙЫН
Қазақстан Республикасының Президенті Қасым-Жомарт Тоқаев өзінің қазақстандықтарға арнаған биылғы «Әділетті Қазақстан: заң мен тәртіп, экономикалық өсім, қоғамдық оптимизм» деген Жолдауында «Дүние жүзінде инвестицияға талас өршіп тұрған кезде елге қаржы тарту үшін «дәл осы жерде және дәл қазір» қағидасы бойынша шешім қабылдау – ең қажет шара. Сондықтан Үкімет жанындағы Инвестиция штабына ауқымды құзырет берілді. Бұл қадам металды терең өңдеу, мұнай-газ-көмір химиясы, туризм, энергетика және машина жасау сияқты маңызды салалардағы жобаларды жүзеге асыру қарқынын арттыруға жол ашты.
Экономикаға салынған тікелей инвестиция көлемін азайтып алмау үшін осы бағыттағы жұмысты күшейту керек» деп өңірлерге инвестиция тартуда жұмысты жандандыра түсуді тапсырды. Түркістан облысының әкімі Дархан Сатыбалдының тікелей бастамашылдығымен өңірге ішкі және сыртқы инвестициялық жобалар тартуға баса көңіл бөлініп келеді. Облыс әкімі өзі бастап бірқатар мемлекеттерге арнайы іссапармен барып, облыстың инвестициялық әлеуетін таныстырып, бірлесіп жұмыс жасауға келісімдер жасасып қайтты. Соның арқасында меморандумғм қол қойған мемлекеттердің инвесторлары Түркістанға атбасын бұруда.
Түркістан облысы әкімінің бірінші орынбасары Зұлпыхар Жолдасов Қытай Халық Республикасының инвесторларымен кездесті. Кездесуде тараптар облыс аумағын сапалы электр қуатымен қамту жайын талқылады.
Облыс әкімінің бірінші орынбасары өңірдің инвестицилық мүмкіндіктері туралы айтып, электр энергиясының қажеттілігіне тоқталды.
– Түркі әлемінің астанасы – Түркістан қаласына қош келдіңіздер! Әр инвестордың жобасын жіті қарап, тиімді ұсыныстар бойынша бірлесе жұмыс істеуге дайынбыз. Түркістан облысының электр энергиясын тұтыну көлемі 330 МВтты құрайды. Облысқа қажетті электр энергиясының 80%-дан астамы солтүстік көздерден «KEGOС» АҚ-ның 220 кВ желісі арқылы жеткізіледі. Алайда қыс мезгілінде тұтыну көлемінің артуына байланысты электр энергиясына деген дефицит байқалады. Мәселені шешу бойынша жобалар қолға алынған. Сіздер ұсынып отырған жобаны да қарап шығуға, екіжақты тиімді келісімге келуге жұмыс атқарамыз, – деді Зұлпыхар Жолдасов.
Қытайлық инвесторлар компания мүмкіндігі туралы ақпарат беріп, өңірді сапалы электр энергиясымен қамтамасыз ету бойынша ниеттерін білдірді.
– Біз Қазақстанға іссапарымызды Түркістан облысынан бастауды жөн көрдік. Күн және жел энергиясын пайдаланып, электр қуатын өндіруді көздеп отырмыз. Электр қуатын сақтайтын ең үздік технология Қытай елінде екені баршаға аян. Қажетті қуат көзін есептеп, облысқа қаржы құюға дайынбыз. Бізге сіздерден қолдау қажет, – деді қытайлық өкіл.
Айта кетейік, облыста 2 энергия өндіруші станциясы жұмыс істеуде. Оның бірі – қуаты 126 МВт болатын Шардара қаласына жақын жердегі Сырдария өзенінің бойында орналасқан су электр станциясы. Екіншісі – 5,5 МВт қуаты бар «Кентау-сервис» МКК. Сондай-ақ жалпы қуаты 278,6 МВт болатын жаңартылатын энергия көздерінің 24 нысаны бар.
Мемлекет басшысы Қасым-Жомарт Тоқаевтың тапсырмасымен электр тапшылығын шешу бағытында Түркістан облысында «Жалпы қуаты 1000 МВтқа дейін генерациялаудың маневрлік режимі бар бу-газ қондырғысы (БГҚ) базасында электр станциясын салу» жобасы іске асырылуда. 2025 жылдың қыркүйегінде қуаты 185 МВт болатын алғашқы қуат беріліп, 2026 жылдың соңына қарай БГҚ толық қуатына шығады деп күтіліп отыр.
