МЕРЗІМДІ ӘСКЕРГЕ ШАҚЫРУДЫҢ КҮЗГІ КЕЗЕҢІ БАСТАЛДЫ

Қазіргі кездегі геосаяси ахуалға қарап отырсаңыз кейбір елдерде отаншылдық, ел алдындағы азаматтық парыз, туған жерге деген құрмет сияқты қасиеттердің адамдар бойында жоғалып бара жатқанын байқауға болады. Бетін аулақ қылсын, әскери қақтығысқа түсіп арасында соғыс жүріп жатқан кей елдердің отан қорғауға қабілетті жастағы азаматтары елін қорғаудың орнына беті ауған жаққа лағып босып, қашып кетуде. Өйткені, олардың бойында отаншылдық қасиеті жоқ, тек өзінің эгоистік өмір сүру туралы түсінігі ғана қалған.
Қазақстанда балабақшадан бастап жас ұрпақтың бойына отаншылдық қасиеттерді құю бағытында жұмыстар басталып, жоғарғы оқу орнын бітіргенше жалғасады. Жалпы мемлекеттің идеологиясы, отбасындағы және мектеп қабырғасындағы тәрбиелер ұштасып отырса дені сау, білікті де тәрбиелі, отанын қорғауға дайын азаматтарды өсіріп шығаруға болады.
Түркістан облысында осы бағытта жұмыстар жүргізіліп келеді. Жыл сайын облыстан отан алдындағы азаматтық міндеттерін орындау үшін әскер қатарына аттанатындар да басқа өңірлерден көп. Көктем және күз айларында жылына екі рет әскер қатарында қызмет етуге онсеіз жастан асқа азаматтар шақырылып отырады. Осы қыркүйек айынан бастап күзгі мерзімге әскерге шақыру науқаны басталған болатын. Осыған байланысты қала әкімінің орынбасары Алмаз Сұлтановтың азаматтарды мерзімді әскери қызметке шақыруды ұйымдастыру және қамтамасыз ету бойынша арнайы жиын өткізді.
Жиынға қалалық біріктірілген қорғаныс істері жөніндегі басқармасының бастығы, подполковник Ерлан Біләлов, денсаулық сақтау, құқыққорғау органдары, ауыл әкімдері мен мамандары қатысты.
Маңызды басқосуда қала әкімінің орынбасары күзгі мерзімдегі әскери қызметке шақыру жұмыстарын жоғары деңгейде ұйымдастырып, әскери қызметке шақырылушылардың уақытылы дәрігерлік тексеруден өтуін қамтамасыз ету, әскерден жалтарып жүрген азаматтарды әскерге тарту және әскери қызмет етудің маңыздылығын насихаттау жөнінде тапсырмалар берді.
Айта кетейік, Арыс қаласынан әскерге шақырылған азаматтар Ұлттық қауіпсзідік комитетінің шекара қызметіне, Қазақстан республикасының қарулы күштері, ҚР Ұлттық ұланы, Мемлекеттік Күзет қызметі, ТЖ министрлігі әскері сапына борыштарын өтей алады.
Қазіргі таңда әскерге аттанған азаматтарға мемлекет тарапынан көптеген қолдаулар қарастырылған. Атап айтқанда, несиесі бар азаматтарға 13 айлық каникул, бұдан бөлек, үлгілі тәртібіне және мерзімді әскери қызметін өтеу кезеңінде жауынгерлік даярлықта қол жеткізген жоғары нәтижелеріне қарай әскери қызметшілерге жоғары оқу орнының гранты есебінен тегін жоғары білім алу мүмкіндігі беріледі.
Бүгінде еліміздің барлық өңіріндегі 40-қа жуық жоғары оқу орны әскери борышын өтеген азаматтарға білім алуға жеңілдік жасайды. Бұл бастама да азаматтардың әскерге баруға құлшынысын оятуға бағытталған.