КОНФЕРЕНЦИЯДА «КҮН ТҰТЫЛҒАН МЕЗЕТ» КІТАБЫ ТАНЫСТЫРЫЛДЫ
Қазақ халқы бірнеше ғасыр ресейлік бодандықта болып, өзінің төл тарихының біраз беттерінің ақтаңдақтарын жеткілікті зерттей алмаған. Әсіресе, соңғы ғасырлардағы көптеген тарихи оқиғалар мен кезеңдер жеткілікті зерттелмек түгілі ақтаңдақ қалпында қалып отырған жайы бар. Қазақстан егемендігін жариялап, еңсесін тіктей бастаған соң ғана қлттық тарихымыздағы ақтаңдақтарды ашып, тарихымыздағы орны олқы тұстарды зерделеу жұмыстары қолға алына бастады. Дегенмен, әлі де мемлекеттік деңгейде қатты қолға алынып, қазақ тарихының ақтаңдақ беттері толық ашылып, тарихымыз түгелдене қойған жоқ.
Оңтүстік өңірінің шежіресін, ұлттық тарихты зерделеп, зерттеп жүрген ұлтын сүйетін отаншыл азаматтар мен ғалымдар тараптарынан жекелей зерттеулердің өзі біраз нәтижелер беруде.
Түркістанда жазушы, тарихшы, шежіреші Момбек Әбдіәкімұлының «Күн тұтылған мезет» кітабының таныстырылымына арналған «Бабай батыр» конференциясы өтті. Іс-шараны Облыстық мәдениет басқармасы басшысының орынбасары Ержан Исатаев, Облыстық ақсақалдар алқасының төрағасы Жарылқасын Әзіретбергенов, облыстық мәслихат депутаттары Баймахан Сүлейменов пен Сүлеймен Арыстанов, Сауран ауданы әкімінің кеңесшісі Мұхаммеджан Жұмадулла ашып, Бабай батырдың тарихтағы алар орны туралы сөз қозғады.
Облыстық «Фараб» әмбебап ғылыми кітапханасында өткен іс-шара барысында арнайы жасақталған кітап көрмесі таныстырылды. Кеш барысында патриоттық әндер шырқалып, келушілерге көтеріңкі көңіл күй сыйлады. «Бабай батыр» конференциясының спикерлері тарихшы, профессор Тұрсын Хазіретәлі, тарихшы, академик Бақытжан Ахметбек, жазушы, тарихшы Баян Адырбекова, жазушы, журналист Шайхы-Асан Сарқұлов және кітап авторы Момбек Әбдіәкімұлы «Күн тұтылған мезет» кітабы жайлы және Бабай батыр жайлы қызықты ақпараттарды ортаға салды.
Түстік қазақтарының 18-19 ғасырлардағы тарихы, тұрмыс-тіршілігі, саяси ахуалы әлі күнге дейін тиісті деңгейде жазылып, шынайы зерттелмей жүр, дейді ғалымдар. Түбі тарихи ақиқатпен қабысқан осындай деректер кітапта көркем тілмен өрнектеліп жазылған. Конференцияға қатысушылар «Ташкент шаһары мен оның айналасындағы Алаш баласының екі-үш ғасыр бұрын тарихы зерттеушілер мен жазушылар назарынан тыс қалып келеді. Осы тарихи хикаят сол олқылықтың орнын толтыратын еңбек десек те болады» деп пікірлерін білдірді.
