ҚАЖЕТТІЛІГІ БАР ЖАНДАРҒА АРНАЛҒАН ИНТЕЛЛЕКТУАЛДЫ САЙЫС ӨТТІ
Мемлекет ерекше қажеттілігі бар азаматтарды қоғамға кіріктіріп, олар өздерін барлық қазақстандықтар сияқты еркін сезініп, азаматтарға жасалыған барлық жақсылықтарды мүмкіндігінше пайдалануына барынша мүмкіндік жасауда. Оларға қаржылай бөлінетін қаржымен қоса көптеен жеңілдіктер жасалынған. Соның бәріне қосымша ерекше қажеттілігі бар жандардың жанына жылу, көңіліне сергу сыйлап, өздерін қоғамның толық мүшелері сезінуі бағытында танымдық, мәдени, өнер мен спорттық, басқа да шаралар ұйымдастыру олардың рухын көтеріп, өздеріне деген сенімдерін нығайта түспек. Түркістан облысында осы бағыттар бойынша көптеген іс-шаралар жүзеге асырылуда.
Солардың бірі -Түркістанда алғаш рет ерекше қажеттілігі бар азаматтар арасында «Tez Tap» интеллектуалдық сайысы өтуі болды. Бұл сайыс облыс аумағында ғана емес республикада қолдап әкетуді қажет ететін тың бастамалардың бірі болды.
Қалалық «Жұмыспен қамту және әлеуметтік бағдарламалар бөлімінің» ұйымдастыруымен өткен сайыста түркістандық және Кентау қаласынан келген 60-тан аса қатысушы бақ сынады. Ерекше қажеттілігі бар азаматтар өздеріне арнап ұйымдастырылған мұндай тың да біліктілікті, тапқырлықты қажет ететін сайысқа қал-қадерлерінше жақсы дайындықпен, көтеріңкі көңіл-күймен келді. Интеллектуалды сайыс мерекелік көңіл күйде өтіп, қатысушыларға да, көрермендерге де үлкен әсер қалдырды.
Білім мен тапқырлықты талап ететін шараға қалалық «Жұмыспен қамту және әлеуметтік бағдарламалар бөлімінің» басшысы Эльмира Бейсенова, қалалық ардагерлер кеңесінің төрағасы Жарқынбек Құлбайымбетов, қалалық әйелдер кеңесінің төрайымы Ұлжалғас Мұстафаева, қалалық мәслихат депутаты Жәмила Сүлейменова қатысты.
– Негізінде 2 жыл бұрын осы жоба туралы идея келген. Оны жүзеге асырудың сәті бүгін түсіп тұр екен. Осы сайыс арқылы бір-біріңізбен етене танысып, бір сәт көңіл сергітсеңіздер, біз үшін үлкен қуаныш – осы. Жарысқа қатысуға қызығушылық танытқандарыңызға алғысым шексіз, сәттілік тілеймін, – деді қалалық «Жұмыспен қамту және әлеуметтік бағдарламалар» бөлімінің басшысы Эльмира Тұңғышбайқызы.
Төрт кезеңнен тұратын сайысқа 18 бен 50 жас аралығындағы азаматтар қатысып, түрлі тақырыптағы арнайы дайындалған сұрақтарға жауап берді. Ой ұшқырлығын таразылаған жобада қатысушылар 10 топқа бөлініп, өз білімдерін ортаға салды.
Сайыс қорытындысымен алғашқы орынды «Достар» тобы иеленіп, II орын «Жігер», III орын «Білімділер» тобына бұйырды. Бұл сайыстан ешбір жан марапатсыз қайтпады. Жеңімпаздар мен жүлдегерлерге, сонымен қатар барша қатысушыларға бағалы сыйлықтар табысталды.
Жүзден жүйріктер анықталған сайыста I орынды иеленген «Достар» тобының мүшесі, түркістандық Сүйеніш Еркінов – 100-ден аса кітап оқыған, білікті жан. Шаһардағы «Фараб» әмбебап ғылыми кітапханасының үздік оқырманы.
– Арнайы мектепте білім алдым. Жасөспірім шақтан өлең-жырға жаным құмартып, кітап оқығанды жақсы көрдім. Сол білім арқылы бүгінгі сайыста командамды алға тартуға тырыстым. Түйген-білгендерімнің жеңіске жетуге көп көмегі тиді. Осындай жоғары деңгейдегі жобаны біз үшін ұйымдастырып, үлкен мүмкіндік сыйлағандарыңызға алғысымды айтамын деді, – жоба жеңімпазы командасының белсенді мүшесі Сүйеніш Ержанұлы.
