БІЛІМ НЫСАНДАРЫНЫҢ ЖЫЛЫТУ МАУСЫМЫНА ДАЙЫНДЫҒЫ ПЫСЫҚТАЛДЫ
Түркістан облысында жаз шыға жаңа қысқы жылыту маусымының дайындық жұмыстары басталып кеткен. Алажаздай жылыту маусымына дайындық барысын облыс әкімі назарында ұстап, жұмыстың жайын бақылап отырды. Күз келіп таулы аймақтарда жылыту маусымы басталып та кетті. Енді облыстың қалған аумақтарында да ауа райын байланысты жылыту науқаны бастала бермек. Облыста білім беру, денсаулық сияқты әлеуметтік нысандардың жылытылуының сапалы боуы маңызды.
Түркістан облысында 1 279 мемлекеттік білім нысанының 63-і орталықтандырылған жылу жүйесі арқылы, 1 216-сы автономды жылыту қазандықтары арқылы жылытылады. Аталған білім нысандарының 100%-ы сығымдау жұмыстарынан өткізіліп, 1157-сінде жылу маусымына дайындық паспорты алынды. Ал қалған 122 нысанға осы апта ішінде алынады деп жоспарлануда. Жылыту маусымына дайындық мәселесі облыс әкімі Дархан Сатыбалдының төрағалығымен өткен жиналыста кеңінен талқыланды.
– Барлық білім нысаны жылыту маусымына толық дайын болуы керек. Балалардың қауіпсіздігі мен білім алуы – басты мәселе. Кемшілік жіберілген аудан, қала білім бөлімі басшыларының жауапкершілігі қатаң қаралады. Алдағы аппарат мәжілісінде аудан, қала әкімдері мен білім саласына жауапты басшылар тағы да есеп береді, – деді Дархан Сатыбалды.
Түркістан облыстық білім басқармасы басшысының міндетін атқарушы Жандос Маханбетовтың айтуынша, облыстағы:
450 білім мекемесіне қажетті 82544,5 тонна қатты отын, 42 білім мекемесіне қажетті 2 399,2 тонна сұйық отын жеткізуші мердігер анықталып, жоспарға сәйкес қажетті отын көлемі қойма сыйымдылығана қарай толығымен
тасымалданды. 720 білім беру нысаны табиғи газ арқылы, 4 білім беру мекемесі электр энергиясы арқылы жылытылады. Облыстағы 107 білім беру мекемелерінің жылу жүйесін
табиғи газға ауыстыру жұмыстары жүргізілуде, оған білім саласынан үнемделген бюджет қаржысы есебінен 2,2 млрд. теңге қаржы қаралған. Қазіргі таңда, мемлекеттік сатып алу конкурсының нәтижесінде жеңімпаздар анықталып, тиісті жұмыстар жүргізілуде. Табиғи газға ауыстырылып жатқан 107 білім беру
ұйымының қатты отынмен жылытылатын 1 қазандығы қалдырылып, қатты отынмен толық қамтамасыз етілген. Жылу беруге толығымен әзірленген.
Сонымен қатар күрделі және ағымдағы жөндеу жұмыстарымен 30-ға жуық білім беру ұйымының жылу жүйелері жаңартылды. Өңірдегі 6 аудан, қалада жылу беру маусымы 15 қазаннан басталды.
Сол сияқты Түркістан қаласының әкімі Әзімбек Пазылбекұлы лездемелік мәжіліс өткізді. Жиында әкім орынбасарлары мен мекеме басшыларының қаладағы жылу беру маусымына дайындық жұмыстары сараланды.
2024-2025 жылғы жылыту маусымына дайындық барысында мекемеге қарасты 17 жылу қазандығы мен 55,3 шақырымдық жылу құбыры тексеруден өтіп, қысымдау жұмыстары жүргізілген.
Қаладағы 219 көпқабатты тұрғын-үй, 65 әлеуметтік нысан, 60 кәсіпкерлік нысан, 33 жер теліміндегі үйлер жылу жүйесімен қамтылады. Шаһардағы автономды көпқабатты тұрғын үйлер саны 160-ты құрайды.
Мәжілісте қала әкімі жауаптыларға нақты тапсырмалар жүктеп, мәселелердің алдын-алдын алуды тапсырды. «1310» Бірыңғай байланыс орталығына тұрғындар тарапынан түскен өтініштер аясында жүйелі жұмыс істеу керектігін жеткізді.
Қазіргі таңда қала бойынша көпқабатты тұрғын үйлер мен мекемелерде жылу қосу алдындағы қысымдау, шаю жұмыстары жүргізілуде. Жұмыс жүргізілу барысында үйде болуларыңызды және жауапкершілікпен, мұқият қарауларыңызды сұраймыз.
Апаттық жағдай орын алған жағдайда мекеме жауапкершілігіне алмайтынын хабарлайды.
