Қазақстан Тәжікстанға шикізат жеткізуді 200 миллион долларға кеңейтуді ұсынды

Қазақстан Республикасы Сыртқы істер министрінің орынбасары Әлібек Қуантыров Тәжікстан Республикасының Инвестициялар және мемлекеттік мүлікті басқару жөніндегі мемлекеттік комитетінің төрағасы Султон Рахимзодамен кездесу өткізді. Кездесу Астанада өтіп жатқан Қазақстан мен Тәжікстан арасындағы сауда-экономикалық ынтымақтастық жөніндегі үкіметаралық комиссияның 19-шы отырысы аясында өтті.

Тараптар сауда және инвестиция саласындағы екіжақты ынтымақтастықты кеңейту, сондай-ақ бірлескен жобаларды жүзеге асыру мәселелерін талқылады. Қазақстан тұрақты түрде Тәжікстанның негізгі сауда-экономикалық серіктестерінің қатарында болды: өткен жылдың қорытындысы бойынша өзара тауар айналымы 7,4%-ға өсіммен 1,3 млрд долларға жетті. Мемлекет басшылары екі жақты тауар айналымының көлемін 2 миллиард долларға жеткізу міндетін қойды.

Кездесу барысында А.Қуантыров Қазақстан Тәжікстанмен сауда және инвестиция саласында өзара тиімді байланыстарды құруға үлкен мән беретінін атап өтті. Айта кету керек, Қазақстан 85 тауар позициясының экспортын 200 миллион АҚШ долларына дейін арттыруға дайын. Бұл ретте министрдің орынбасары тәжік тарапын ағымдағы жылдың 31 қазанында өтетін Қазақстандық жаһандық инвестициялық дөңгелек үстелге (KGIR) қатысуға шақырды.

«Экономикалық ынтымақтастықты жаңа деңгейге көтеру үшін бізде барлығы бар – тауар айналымының артуы, бизнестің ынтымақтастыққа дайындығы және мемлекет басшылығы деңгейінде түсіністік. Алдағы жылдары біз тек саудада ғана емес, бірлескен инвестициялық жобаларда да өсім болатынына сенімдімін», — деді А.Қуантыров.

Сондай-ақ ол теміржол көлігі саласында тұрақты оң динамика бар екенін қосты. 2024 жылы Қазақстан мен Тәжікстан арасындағы тасымалдаудың жалпы көлемі 8 пайызға өсіп, 5,1 миллион тоннаға жетті. Ағымдағы жылдың бірінші жартыжылдығында көлем 2,7 млн тоннаны құрады, бұл өткен жылдың сәйкес кезеңімен салыстырғанда 12,1%-ға артық. Автомобиль көлігімен тасымалдау көлемі де 45 пайызға артып, 494 мың тоннаға жетті. Сонымен қатар, Тәжікстанға қазақстандық теміржол техникасын жеткізуге мүмкіндіктер ашылуда.

Кездесу барысында С.Рахимзода Қазақстанмен инвестициялық және сауда ынтымақтастығын нығайту елдер арасындағы өзара сенімнің жоғары деңгейі мен тұрақты экономикалық динамикасын ескере отырып, Тәжікстан үшін стратегиялық маңызы бар екенін атап өтті. Ол сондай-ақ қазақстандық тарапты ағымдағы жылдың қазан айында Душанбеде өтетін инвестициялық форумға қатысуға шақырды.

«Қазақстан Тәжікстанның жетекші экономикалық серіктестерінің бірі болып қала береді. Біз сауда-саттықтан бастап бірлескен кәсіпорындар құруға дейінгі барлық негізгі бағыттар бойынша ынтымақтастықты кеңейтуге мүдделіміз. Жоспарланған бастамаларды жүзеге асыру екіжақты қарым-қатынастарымыздың дамуына жаңа серпін беретініне сенімдімін», — деді ол.

Әңгімелесушілер екі елдің еркін және арнайы экономикалық аймақтарында өндіріс орындарын құру бойынша бірлескен инвестициялық жобалар ерекше қызығушылық тудыратынын атап өтті, атап айтқанда, ұн, кондитерлік өнімдер, өсімдік майы өндірісі, мал шаруашылығы өнімдерін қайта өңдеу, сондай-ақ тәжік серіктестерінің қатысуымен табиғи шырындар мен концентраттар өндіру. Қазақстан Тәжікстан экономикасына төрт ірі инвестордың бірі болып табылады және бүгінгі күнге дейін инвестицияның жалпы көлемі 146 миллион АҚШ долларынан асты.

Өнеркәсіп пен логистикадан бастап ауыл шаруашылығы өнімдерін өңдеу мен энергетикаға дейінгі басым салалардағы ынтымақтастықты нығайту ниеті расталды.