ДАЛА СЕМИНАРЫНДА ЖАҢА ӘДІСПЕН ЖҮЗІМ ӨСІРУ ТАНЫСТЫРЫЛДЫ
«Қуатты өңірлер –Ел дамуының драйвері» ұлттық жобасы бұған дейінгі мемлекеттік жобалар мен бағдарламалар сияқты мемлекетіміздің экономикасын қарқынды дамытуға аймақтардың қосар үлесін арттыруға бағытталған. Өңірлердің экономикалық жетістіктерінің ауқымын арттыру үшін озық технологияны енгізіп, инвестиция тарту, түрлі бағдарлама, жобаларды тиімді пайдалана отырып өндірістер мен шаруа қожалықтарын, шағын кәсіпкерлікті ашу арқылы тұрғындарды тұрақты жұмыспен қамтудың санын көбейту керек.
Түркістан облысында осы мақсаттарға қол жеткізу жолында ауқымды жұмыстар жүзеге асырылуда. Облыста жүзім шаруашылығын дамытуда жаңа технологияларды қолдану көзделіп отыр. Бұл мәселе Түркістан облысы, Сайрам ауданында өткен дала семинарында кеңінен талқыланды. Оған облыс әкімі Дархан Сатыбалды арнайы қатысып, ғалымдармен, шаруалармен пікір алмасты.
«Ауыл шаруашылығын дамыту: «ЭКО-бақ» жүзімдік алқаптарында экспортқа бағытталған, нарықта жоғары сұранысқа ие жүзім сұрыптарын өсіруде озық инновациялық технологиялар және заманауи машиналар кешенін тиімді пайдалану» тақырыбындағы «Егінжай күні» дала семинарына білікті ғалымдар, шаруалар, кәсіпкерлер қатысты. Өзбекстаннан келген сарапшы, «Eco Fruit Conseil» компаниясының басшысы Шухрат Аброров көрші елдегі жүзім өсіру тәжірибесін таныстырды.
Түркістан облысының әкімі Дархан Сатыбалды жүзім шаруашылығының маңызына тоқталып:
– Таптаурын тәсілдерден қашып, жаңа технологияларды батыл енгізу керек. Ғылым, ауыл шаруашылығы дамып бара жатыр. Биыл Қытайға барған сапарымызда жүзім алқаптарын көрдік. Өнімділік өте жоғары әрі жүзімдері ерекше дәмді. Біздің шаруаларға қалай өсіруді үйретуге дайын. Облысымызда жүзім шаруашылығын дамытуға мүмкіндік мол. Әр ауыл белгілі бір кәсіп түрі мен шаруашылыққа бейімделіп, жүйелі түрде өнім шығарса ғана экспорттық әлеует көтеріледі. Бірігу, ірілену, жаңа технологияларды енгізу өте маңызды. Бұл ретте ғалымдарымыз да көмектесіп, жүзімнің төзімді, өнім мол беретін түрлерін әзірлеуге қолдау көрсетеді деп сенемін, – деді Дархан Сатыбалды.
Семинарда «ДАНА» модельді шаруашылығының құрылтайшысы, ҚР Ұлттық аграрлық ғылымдар академиясының академигі Бердияр Қалымбетов Сайрам ауданына зерттеуден өткізілген жүзім сұрыптары егілгенін, олар жайқалып өсіп жатқанын мәлімдеді. Арнайы технология мен машиналар кешенімен таныстырды. 3 гектар жерге жүзім егілген. Жүзім сорттары экспортқа бағытталған. Нарықта жоғары сұранысқа ие жүзім сұрыптарын өсіруде. Озық инновациялық технология және машиналар кешенін тиімді пайдаланудың арқасында 1 гектардан 15 тонна өнім алу жоспарланып отыр. 20 түрлі ауыл шаруашылығы техникасы мен шағын машина-технология станциясы бар.
Семинарда жүзім шаруашылығынан бөлек, ағаштар мен өсімдіктерді түрлі аурулардан, зиянкестерден қорғау,өнімділікті арттыру, ғылыми жетістіктерді өндіріске жедел енгізу жолдары қаралды. Ұсынылған идеялар бойынша тиісті жұмыс жүреді.
Облыс әкімі Сайрам ауданындағы жұмыс сапарында «Манкент» шипажайы аумағында болып, су үнемдеу технологиясын ендіру аясында атқарылып жатқан жұмыстармен де танысты. Аталған шипажай Алматы қаласынан ЖК «Agro Line KZ» сатушы мекемесінен 3 дана JP90-450 барабан типті жаңбырлатып суғару машиналарын сатып алып, жоңышқа алқабына орнатқан. Бүгінгі таңда жаңбырлатып суғару жұмыстары атқарылуда. Жобаның құны 37,2 млн теңгені құрайды, қаражат толығымен шипажай басшылығының өз қаржысымен жүзеге асты. Жобаның ерекшілігі –қарапайым тәсілмен суғарылатын жоңышқалық алқапқа қарағанда ағын су көлемін 50%-ға үнемдейді. Өнімділікті әр гектарынан 200 центнерге дейін жеткізеді.
Дархан Сатыбалды ауыл шаруашылығында тамшылатып суғару, жаңбырлатып суғару технологияларын енгізу негізгі міндеттердің бірі екенін айтты. Осы бағытта өңірімізде су үнемдеу технологияларын шығаратын кәсіпорындар ашылып жатыр. Тиісті жұмыстар жалғасады.
