ЖАҢА ОҚУ ЖЫЛЫНА ЛАЙЫҚТЫ ДАЙЫНДЫҚ ЖАСАЛУДА

«Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін жағдай жасалуы тиіс. Сол үшін «Жайлы мектеп» жобасы қолға алынды. Біз 2025 жылға дейін 800 мың баланың заманауи мектепте білім алуына жағдай жасаймыз» деген Қазақстан Республикасының Президенті Қасым-Жомарт Тоқаевтың ҚР Үкіметінің 2022 жылғы 14 шілдедегі кеңейтілген отырысында берген тапсырмасын орындау мақсатында «Жайлы мектеп» Ұлттық пилоттық жобасын іске асыру шеңберінде 2023-2025 жылдары Түркістан облысында 63 мектептің (жобалық қуаттылығы 49 000 орын) құрылысын салу жоспарлануда. Қаржысы болжаммен 315,4 млрд. теңге.

Аталған 63 мектептің ішінде 300 орындық – 11 мектеп, 600 орындық – 25 мектеп, 900 орындық- 15 мектеп, 1200 орындық – 6 мектеп, 1500 орындық – 4 мектеп, 2000 орындық – 2 мектеп бар. Олар аймақтар бойынша:

-Түркістан қаласында 8 мектеп; -Кентау қаласында – 2 мектеп; -Арыс қаласында – 2 мектеп; -Шардара ауданында – 2 мектеп; -Сарыағаш ауданында – 10 мектеп; -Бәйдібек ауданында – 1 мектеп; -Жетісай ауданында – 6 мектеп; -Қазығұрт ауданында – 1 мектеп; -Келес ауданында – 5 мектеп; Сайрам ауданында – 3 мектеп; -Мақтаарал ауданында – 5 мектеп; -Отырар ауданында – 1 мектеп; -Ордабасы ауданында – 5 мектеп; -Созақ ауданында – 1 мектеп; -Төлеби ауданында – 4 мектеп; -Түлкібас ауданында -2 мектеп; -Сауран ауданында – 5 мектеп;

Нәтижесінде 49 мың оқушыға мектептен орын дайындалады. Ұлттық жоба аясында облыстағы анықталған апатты 8 мектептің 3-нің мәселесі, 21 үш ауысымға өту қаупі бар мектептердің 14-нің мәселесі шешіледі, деп күтілуде.

Еліміздегі әрбір 7-ші оқушы Түркістан облысында тұрады. Мектеп тапшылығын жою бағытында ауқымды жұмыс жүріп жатыр. Облыс әкімі Дархан Сатыбалдының тапсырмасымен және қолдауымен аймақтағы күрделі және ағымдағы жөндеуді қажет ететін білім ұяларының, жаңа мектептер қажет елді мекендердің тізімі әзірленіп, мәселені шешу бойынша нақты шаралар қолға алынған. Биыл өңірде балабақша, мектеп, колледж, лагерь жалпы 300-ден аса білім беру ұйымында жөндеу жұмыстары басталып кеткен. Бұндай ауқымды жұмыс өңір тарихында болмаған.

Еліміз бойынша білім нысаны ең көп салынып жатқан өңір – Түркістан. Бүгінде жергілікті бюджеттен 20 мектептің құрылысы жүргізілуде. Жыл соңына дейін 13-і пайдалануға беріледі. 2023-2025 жылдары «Жайлы мектеп» жобасы аясында 63 мектеп салу көзделген. Оның ішінде 29-ы биыл тапсырылады деп жоспарланған. Мектеп салу бағытындағы жұмыс жалғасады.

Өңірде тозығы жеткен білім ұялары көп. Талай жыл бойы қордаланған бұл мәселені шешу бағытында жүйелі жоспар жасалған. Білім саласында инфрақұрылымды жақсарту жұмыстары қарқынды жүріп жатыр. Қазіргі таңда 22 мектеп күрделі жөндеуден өтуде. Құрылысқа «Ауыл — Ел бесігі» бағдарламасы және облыстық бюджеттен жалпы қаржы қаралған. 11 мектеп 1 қыркүйекте ел игілігіне тапсырылып, оқушыларды қабылдайды деп күтілуде. 200-дей білім ұйымы ағымдағы жөндеуден өтуде. Ғимараттардың құрылыс сапасы қатаң бақылауда. 106 мектептің жылу қазандықтарын газ жүйесіне ауыстыруға да қаржы қаралып, тиісті жұмыстар жүргізілуде.

Әрбір оқушының білім алып, жан-жақты дамуы үшін қолайлы жағдай жасалуға тиіс. Сондықтан да балалар қауіпсіздігі де басты назарда. Мектептерге 7 мыңнан астам бейнекамералар орнатылып, полиция департаментінің жедел басқару орталығына қосылды. Мемлекеттік 938 білім беру мекемелері 100% дабыл батырмасымен қамтылып, жедел басқару орталығына қосылды. Кәсіби күзет қызметімен қамтамасыз етілуі тиіс бала саны 300-ден жоғары 573 білім беру ұйымдары толық лицензияланған күзет қызметіне өтті. Облыстағы 179 білім беру ұйымының 102 шақырым қоршауы жаңғыртылды. Мектеп алды көшелерде жарықтандыру жүйелері мен арнайы жол белгілері орнатылды. Осылайша Түркістан облысы негізінен жаңа оу жылына лайықты дайындықтармен келіп отыр.